Завяршаецца збор подпісаў у падтрымку вылучэння кандыдатаў на пасаду прэзідэнта

Сёння — апошні дзень збору подпісаў у падтрымку вылучэння кандыдатаў у прэзідэнты Беларусі. Збор подпісаў пачаўся 23 ліпеня. 



Подпісы збіралі ініцыятыўныя групы васьмі прэтэндэнтаў на пасаду прэзідэнта: 
- Сяргея Гайдукевіча — старшыні Ліберальна-дэмакратычнай партыі; 
- Сяргея Калякіна — старшыні Беларускай партыі левых "Справядлівы свет"; 
- Таццяны Караткевіч — актывісткі кампаніі "Гавары праўду", якая прадстаўляе кааліцыю "Народны рэферэндум"; 
- Анатоля Лябедзькі — старшыні Аб'яднанай грамадзянскай партыі; 
- Аляксандра Лукашэнкі — дзейнага прэзідэнта; 
- Жанны Раманоўскай — беспрацоўнай настаўніцы з Брэста; 
- Віктара Цярэшчанкі — эканаміста, экс-кандыдата ў прэзідэнты на выбарах 2010 года; 
- Мікалая Улаховіча — старшыні Беларускай патрыятычнай партыі, вярхоўнага атамана РГА "Беларускае казацтва". 
Здаць сабраныя подпісы ў тэрытарыяльныя выбарчыя камісіі ініцыятыўныя групы павінны да 19.00 21 жніўня. 

Анатоль Лябедзька напярэдадні прызнаў, што яго групе не ўдалося сабраць 100 тысяч подпісаў. "Вядома, маглі сабраць, але мы пайшлі на эксперымент, арганізаваўшы выключна валанцёрскую кампанію. І мы зараз ведаем людзей, якія пойдуць на ўсё, таму што ў іх ёсць перакананні", — сказаў старшыня Аб'яднанай грамадзянскай партыі 20 жніўня на пікеце "За сумленныя свабодныя выбары!". "Калі б гэта былі выбары, то мы б уключылі і фінансавы складальнік і сабралі", — дадаў ён. 
Па ўсёй бачнасці, не атрымаецца сабраць неабходную колькасць подпісаў і ініцыятыўнай групе Сяргея Калякіна. Паводле даных на 16 жніўня, у падтрымку вылучэння лідара партыі "Справядлівы свет" было сабрана 70 тысяч подпісаў. "Сабраць 30 тысяч за астатнія пяць дзён, напэўна, будзе праблематычна", — сказаў у каментары БелаПАН кіраўнік ініцыятыўнай групы Валерый Ухналёў.
Жанна Раманоўская дагэтуль не паведамляла пра колькасць сабраных подпісаў, аднак, калі ўлічыць малалікасць яе ініцыятыўнай групы і малавядомасць самой прэтэндэнткі, відавочна, што яна таксама выбывае з прэзідэнцкай кампаніі. 
Паводле каляндарнага плана ЦВК, рэгістрацыя кандыдатаў у прэзідэнты павінна прайсці з 6 па 15 верасня. Аднак, як заяўляла кіраўнік Цэнтрвыбаркама Лідзія Ярмошына, разгледзець пытанне пра рэгістрацыю кандыдатаў ЦВК плануе на пасяджэнні 10 верасня. Пасля атрымання адпаведных пасведчанняў кандыдаты ў прэзідэнты змогуць пачаць перадвыбарную агітацыю. 
Пятыя выбары прэзідэнта Рэспублікі Беларусь пройдуць 11 кастрычніка.
БелаПАН