Андрэй Краўчанка — пра стан беларускага спорту: «Палацаў набудавалі, а сістэмы няма»

Беларуская лёгкаатлетка Крысціна Ціманоўская, якая адмовілася вяртацца на радзіму пасля ціску на Алімпіядзе, заявіла, што беларускія ўлады забаранілі спартоўцам выяжджаць на спаборніцтвы і нават на адпачынак за мяжу. Паводле яе словаў, афіцыйна такой забароны няма, але яе калегі скардзяцца, што атрымліваюць такія ўказанні.

cf9636c4_3942_471d_a1a4_c02833c37e49_tv_w650_r1.webp


Беларускі лёгкаатлет Андрэй Краўчанка, які таксама адмовіўся вяртацца ў Беларусь і застаўся ў Германіі разам з жонкай, расказаў «Настоящему Времени» пра тое, што вядома пра новую забарону і як гэта адаб’ецца на карʼеры беларускіх спартоўцаў.

— Як вы даведаліся аб забароне для беларускіх спартсменаў выязджаць на спаборніцтвы за мяжу?

— Мне напісаў ананім у інстаграме, паказаў перапіску, сказаў, што пра гэта хутка ўсё даведаюцца. Я спачатку падумаў, што гэта нейкі ўкід, няправільная інфармацыя, і пачакаў трохі. І на наступны дзень адзін з маіх калег пацвердзіў інфармацыю. Ён збіраўся выехаць на камерцыйны старт і яму сказалі: «Калі паедзеш, то толькі праз заяву на звальненне». Я зразумеў, што гэта не чуткі, што гэта праўда.

У мяне такое меркаванне, што, магчыма, гэта будзе нейкая часовая мера, паколькі 12 верасня будзе паўмарафон, дзе Лукашэнка будзе прысутнічаць. І яны хочуць зрабіць прыгожую карцінку — сабраць усіх спартсменаў, якія на кантракце, таму што ім у любым разе прыйдзецца ісці альбо звальняцца. Хочуць сабраць, напэўна, войска, МУС — усіх пазбіраць і зрабіць прыгожую карцінку. Магчыма, для гэтага хочуць, каб ніхто не выязджаў з краіны, каб усе былі на месцы.

— То-бок, зараз маюць адбыцца нейкія камерцыйныя спаборніцтвы за мяжой — і для таго каб вакол Лукашэнкі сабралася як мага больш спартсменаў, іх за мяжу не выпускаюць?

— Гэта адна з версій. Яшчэ адна версія, што не жадаюць, каб спартсмены ўзялі прыклад з Крысціны Ціманоўскай і шукалі магчымасць трэніравацца і выступаць за іншыя зборныя.

— Гэта азначае, па сутнасці, што ўлады Беларусі баяцца, што беларускія спартсмены будуць бегчы з краіны, калі выедуць за мяжу на спаборніцтвы, папросяць там палітычны прытулак?

— У любым выпадку спартсмены будуць з'язджаць, таму што такое трываць вельмі складана — увесь час нешта круцяць... Вельмі цяжка будзе спартсменам цяпер. Фінансаванне будзе ўразацца — будзе эканомія. Я не ведаю, што будзе далей.

— Многія спартыўныя аглядальнікі называюць выступленне беларускай зборнай на Алімпіядзе ў Токіа не самым удалым. Лукашэнка таксама выказваў незадаволенасць. Як вы лічыце, магчыма, палітычнае становішча ў краіне паўплывала на такі няўдалы алімпійскі вынік?

— Ды не, гэта ўжо сістэма ўся парушаная. Няма сістэмы падрыхтоўкі, усё будуецца на індывідуальных якасцях спартсменаў, на таленце. Медалёў з кожнай Алімпіядай усё менш і менш. Таму пакуль не будзе нейкай нармальнай сістэмы развіцця спорту ў краіне, калі ў спорце будуць менавіта спартсмены, а не ваенныя, тады і будзе развіццё, тады можна будзе казаць пра добрыя выступы на спаборніцтвах і гэтак далей. А зараз пакуль усё дэградуе.

— Вы ў жніўні выехалі з краіны. Магчыма, беларускай алімпійскай зборнай бракуе спартсменаў праз тое, што яны бягуць з краіны?

— Не, гэта ўсё адбываецца праз сістэму падрыхтоўкі. Трэнераў не хапае, усё сумна, на самай справе. Палацаў набудавалі, а сістэмы няма.

— Як склаўся лёс у беларускіх спартсменаў, якія публічна выказалі нязгоду з вынікамі прэзідэнцкіх выбараў у Беларусі і павінны былі выехаць з краіны?

— Іх рэпрэсавалі. Калі браць маю гісторыю — мяне звольнілі адусюль імгненна, нават не папярэдзілі пра гэта. Іншых спартсменаў запалохвалі, да мяне прыязджалі з пагрозамі — шмат было ўсяго. І ў турме многія пасядзелі, і сядзяць шмат хто ў турме да гэтага часу. Таму нічога добрага з гэтага не выйдзе.

— Вы выехалі з Беларусі. Які цяпер будзе ваш далейшы лёс за мяжой?

— Мой далейшы лёс будзе залежаць толькі ад мяне. Я буду шукаць магчымасць тут трэніраваць людзей. Бо ў Беларусі я гэтага рабіць не магу, прыйдзецца трэніраваць дзяцей у Германіі. Жонка, я думаю, працягне карʼеру ў якім-небудзь нямецкім клубе.

— Гэта значыць, што так ці інакш свой далейшы спартыўны лёс спартоўцы, якія выязджаюць з Беларусі, за мяжой знаходзяць?

— Так.