Брусель узяўся за Орбана? Еўрапарламент заклікаў не даваць Венгрыі грошы ЕС

Дэпутаты Еўрапейскага парламента прынялі рэзалюцыю, у якой заклікалі не прадастаўляць Венгрыі субсідыі Еўрасаюза, пакуль у краіне не правядуць неабходныя рэформы. За рэзалюцыю прагаласавалі 345 дэпутатаў, 104 выступілі супраць, 29 устрымаліся, паведамляецца на сайце Еўрапарламента.

Аўтары рэзалюцыі заклікалі правесці юрыдычную праверку пастановы Еўракамісіі, якая ў снежні 2023 года размарозіла для Будапешта 10,2 мільярда еўра. Гэта каля траціны сродкаў, замарожаных ЕС у 2022 годзе з-за праблем Венгрыі з вяршэнствам закона і хабарніцтвам.

Еўрапарламент асудзіў дзеянні прэм'ер-міністра Венгрыі Віктара Орбана, які ў снежні заблакаваў папраўкі ў бюджэт Еўрасаюза, якія прадугледжвалі вылучэнне Украіне 50 мільярдаў еўра. Еўрапарламент заявіў, што настойвае на тэрміновым выкананні ўжо ўзятых абавязацельстваў па фінансаванні Украіны і заклікаў Еўрасавет узгадніць такую пазіцыю на пазачарговым саміце 1 лютага.

У рэзалюцыі сказана, што ўрад Венгрыі прадпрымае «наўмысныя, пастаянныя і сістэматычныя намаганні», якія падрываюць асноватворныя каштоўнасці ЕС. Аўтары дакумента заявілі, што «Еўрасаюз ні ў якім разе не можа паддавацца шантажу і гандляваць стратэгічнымі інтарэсамі ЕС і яго хаўруснікаў, адмаўляючыся ад сваіх каштоўнасцяў». Дэпутаты заклікалі рэфармаваць працэс прыняцця рашэнняў у Еўрасавеце, «каб пакласці канец злоўжыванню правам вета і шантажу».

Прынятая рэзалюцыя не абавязковая да выканання, але, як адзначае Bloomberg, узмацняе ціск на Еўракамісію і краіны — ўдзельніцы ЕС, каб яны занялі больш жорсткую пазіцыю ў дачыненні да фінансавання Венгрыі.

Венгрыя заблакавала выдзяленне ЕС 50 млрд еўра дапамогі Украіне

Еўрасаюз у 2022 годзе прыпыніў выдзяленне Венгрыі каля 30 мільярдаў еўра з-за праблем з вяршэнствам закона і хабарніцтвам. Каб разблакаваць грошы, Венгрыя павінна выканаць шэраг патрабаванняў — ад забеспячэння акадэмічнай свабоды да абароны правоў ЛГБТК-супольнасці. У снежні 2023 года ЕС выдзеліў Венгрыі каля 10 мільярдаў еўра замарожаных сродкаў пасля таго, як урад Віктара Орбана выканаў патрабаванні па ўмацаванні незалежнасці судовай сістэмы.

Пры гэтым каля 20 мільярдаў еўра засталіся заблакаваныя для Венгрыі. 17 студзеня кіраўніца Еўракамісіі Урсула фон дэр Ляен паведаміла, што сродкі «застануцца заблакаванымі датуль, пакуль Будапешт не выканае ўсе неабходныя ўмовы». Кіраўнік канцылярыі прэм'ер-міністра Венгрыі Гергей Гуйяш заявіў 18 студзеня, што краіна не будзе мяняць законы, якія, на думку Еўрасаюза, ушчамляюць правы ЛГБТК-супольнасці і просьбітаў прытулку.