Экс-прэм'ер Францыі атрымаў год турмы і вялізны штраф за выплаты жонцы

Апеляцыйны суд Парыжа прыгаварыў экс-прэм'ера Францыі Франсуа Фіёна да чатырох гадоў пазбаўлення волі, у тым ліку да года ў турме. Яму таксама давядзецца заплаціць штраф у 375 тыс. еўра па справе аб фіктыўным працаўладкаванні жонкі Пенелопы Фіён.

Паводле інфармацыі тэлеканала France 24, Пенелопу прыгаварылі да двух гадоў умоўна і аналагічнага штрафу ў 375 тыс. еўра.
Прэм'ер-міністрам Францыі Фіён быў з 2007 па 2012 год, калі краінай кіраваў Нікаля Сарказі. Ён таксама балатаваўся на пасаду французскага прэзідэнта ў 2017 годзе. Тады і разгарэўся скандал: журналісты выдання Le Canard Enchaîné высветлілі, што Пенелопа Фіён з 1998 па 2007 год атрымала 500 тыс. еўра за працу памочніцай у свайго мужа і яго намесніка ў парламенце. Яшчэ 100 тыс. еўра яна зарабіла як літаратурны кансультант у часопісе Revue des Deux Mondes.
У артыкуле журналісты сцвярджалі, што працаўладкаванне было фіктыўным. У выніку ў сакавіку 2017 года расследаванне пачалі праваахоўныя органы Францыі. На фоне скандалу ў першым туры выбараў Фіён стаў трэцім, набраўшы 20%. Ён саступіў Марын Ле Пэн і Эманюэлю Макрону.
У 2020 годзе парыжскі суд прызнаў Фіёна вінаватым у растраце дзяржаўных сродкаў. Яму прызначылі пяць гадоў пазбаўлення волі, тры з якіх умоўна, а таксама штраф на 375 тыс. еўра. Акрамя таго, палітыку на 10 гадоў забаранілі ўдзельнічаць у выбарах. Ягоная жонка атрымала такі ж штраф і тры гады ўмоўнага тэрміну. Муж і жонка не прызналі віну і паспрабавалі аспрэчыць рашэнне суда.
officelife.media