Гамяльчук спрабаваў перасекчы ўкраінска-беларускую мяжу па савецкіх дакументах

Недалёка ад вёскі Ніжняя Рудня на Жытоміршчыне памежнікі аддзела «Лучанкі» Жытомірскага атрада затрымалі чалавека, які спрабаваў незаконна перасячы беларуска-ўкраінскую мяжу.

Як інфармуе Цензор.НЕТ, пра гэта гаворыцца ў паведамленні прэс-службы Дзяржпагранслужбы Украіны.
«Інфармацыю аб з'яўленні ў памежнай зоне невядомага, які распытвае пра месца, дзе можна перасекчы дзяржаўную мяжу, у аддзел памежнай службы паведамілі мясцовыя жыхары. Памежнікі неадкладна адрэагавалі на сігнал і неўзабаве непадалёк дзяржаўнай мяжы знайшлі чалавека, які, ігнаруючы інфармацыйныя знакі «Увага! Дзяржаўная мяжа», спрабаваў патрапіць у суседнюю Беларусь», — сказана ў паведамленні.
У ходзе праверкі мужчына не змог прад'явіць ніякіх дакументаў акрамя ваеннага білета СССР і паведаміў, што па месцы жыхарства ў яго ёсць пашпарт СССР. Як пасля высветлілася, мужчына, ураджэнец Гомельскай вобласці Рэспублікі Беларусь, ужо больш за 20 гадоў пражываў на тэрыторыі Украіны і пасля пэўных сямейных абставінаў вырашыў вярнуцца на сваю гістарычную радзіму. Аднак разумеючы, што па савецкіх дакументах не зможа перасекчы мяжу, ён вырашыў абысці пункты пропуску.
Таксама ён паведаміў, што на тэрыторыі Беларусі яго павінны былі сустрэць блізкія сваякі. Для праверкі гэтай інфармацыі ўкраінскія памежнікі паведамілі беларускім калегам. Ужо неўзабаве ад памежнікаў сумежнага боку была атрымана інфармацыя пра выяўленне названых асоб.
У дачыненні да правапарушальніка складзены працэсуальныя дакументы за парушэнне артыкулаў 204-1 КУоАП (Незаконнае перасячэнне або спроба незаконнага перасячэння дзяржаўнай мяжы Украіны) і 203 КУоАП (Парушэнне замежнікамі і асобамі без грамадзянства правілаў знаходжання ва Украіне і транзітнага праезду праз тэрыторыю Украіны).
Паводле Цензор.НЕТ