Германія. Як патрапіць на вялікі экран

У Германіі патрапіць на вялікі экран вельмі проста. Для гэтага трэба патрапіць у шэрагі актывістаў правапапулісцкіх партый.

Апошнім часам мясцовая кінаіндустрыя вырашыла далучыцца да кампаніі супраць росту папулярнасці правых папулістаў. На экраны тэлевізіі і кіно канвеерам выходзяць мастацкія фільмы або серыялы, якія распавядаюць пра пагрозу з боку партый накшталт «Альтэрнатыва для Германіі» (AfD). Іх назвы кажуць самі за сябе: «Цёмны час», «Я яшчэ ніколі не забіваў», «Дэмакратыя памірае ў цемры».

Прычым, каб асабліва не напружвацца, рэжысёры капіююць рэальных актывістаў AfD. Так, у фільме «Цёмны час» лідар выдуманай партыі «Новыя патрыёты» відавочна спісаны з фігуры Фраўке Петры — адной з кіраўнічак AfD.

Яшчэ далей пайшлі стваральнікі фільма «Я ніколі не забіваў», дзе верхавод правых папулістаў — копія «альтэрнатыўшчыка» Аляксандра Гаўланда.

Нягледзячы на такі трэнд, Гаўланд і Петры не спяшаюцца бегчы ў суд. Яны спадзяюцца, што іх аватары спадабаюцца немцам, паколькі на экране ім супрацьстаяць панкі, гомасексуалісты, мусульмане і іншыя непадобныя да звычайных бюргераў асобы.

Паводле нямецкай прэсы