Кранальная гісторыя. Сям'я хавала ад 93-гадовай кіяўлянкі, што РФ развязала вайну. Бабуля пакрыўдзілася

93-гадовая кіяўлянка Алена Ільінічна Лугавая больш за месяц не здагадвалася, што ва Украіне пачалася поўнамаштабная вайна, а яе родны горад Кіеў абстрэльваюць ракетамі. Родныя хавалі ад яе, баючыся, што з-за ўзросту і хісткага здароўя жанчына можа не вытрымаць гэта. Пра гэта гаворыцца ў сюжэце ТСН, піша unian.net.

Алена Ільінічна нарадзілася ў 1928 годзе і добра памятае і рэпрэсіі 1937 года, і Другую сусветную вайну, і трагедыю і Бабіным Яры.

Жанчына — кандыдат гістарычных навук, якая за свае праўкраінскія навуковыя працы падчас СССР падвяргалася ганенням. Усе жахі, якія давялося перажыць у дзяцінстве, яна пераказвала родным.

Нявестка — адзіная сваячка Алены Ільінічны — баялася, што навіна аб яшчэ адной вайнt яе свякроў не вытрымае, таму вырашыла гэта схаваць.

«Калі пачалася вайна, яна была дрэнная. Цяпер яна рухаецца з палачкай, тады наогул не рухалася. Мы вырашылі, накладваць на гэта яшчэ і перажыванні, гэта будзе празмерна», — запэўнівае нявестка Надзея.

Таму ў доме раптам «выйшла з ладу» тэхніка, а ўсім знаёмым забаранілі хоць бы словам згадваць пра вайну.

Трымаць усё ў таямніцы ўдавалася 33 дні, пакуль хтосьці не прагаварыўся ў тэлефоннай размове.

«Яна не выдала б гэтую сяброўку і пад катаваннямі. Яна сказала нам з сядзелкай, што мы здзейснілі злачынства, што яе адлучылі ад інфармацыі. Што гэта грэх», — кажа нявестка.

Цяпер жанчына слухае навіны па некалькі гадзін у дзень і спявае —— такім чынам змагаецца з перажываннямі і бессанню.

Кіяўлянка прызнаецца: адзінае, аб чым шкадуе, што не можа абараняць краіну.

«З вялікім жаданнем, калі б я не была такая старая, я і сляпая, і глухая. Я ледзь рухаюся, але хачу, каб Украіна стала незалежнай дзяржавай», — кажа жанчына.