У Марыупалі расійцы скінулі магутную бомбу на бальніцу. Пад заваламі людзі, у тым ліку дзеці (абноўлена)

У Марыупалі расійскія акупанты скінулі магутную бомбу на лякарню ў раёне завода «Азоўсталь», пад заваламі знаходзяцца блізу 300 чалавек, у тым ліку дзеці.

Пра гэта паведаміў у Facebook народны дэпутат Украіны і бізнэсовец Сяргей Тарута, піша unian.net.

«Расійскія фашысты скінулі магутную бомбу на бальніцу ў раёне «Азоўсталі». Паводле маёй інфармацыі, пад заваламі там каля 300 чалавек, сярод іх дзеці. У ацалелай частцы бальніцы былі параненыя абаронцы і хаваліся марыупальцы з дзецьмі. Таму што ў знішчаным горадзе хавацца больш няма дзе! Не хапае слоў», — напісаў Тарута.

Палітык нагадаў, што напярэдадні СБУ выклалі перахопленую размову аднаго з расійскіх вайскоўцаў, у якой гаварылася, што на «Азоўсталь» будуць скідаць трохтонныя бомбы.

«Ты ўяўляеш, які там будзе выбух? А як жа мірныя? — перапытвае жаночы голас. — Загад: раўняць з зямлёй, адказвае орк. — Хто мірныя? Засталіся толькі патрыёты і моцна разумныя», — працытаваў Тарута перахоплены запіс.

«То «моцна разумныя» — гэта дзеці ў бальніцы ў раёне «Азоўсталі», на якіх вы скінулі бомбу? За тое, што яны ўкраінцы? Забойцы. Спыніце генацыд у Марыўпалі! Палітыкі, лідары, людзі свету, спыніце гэты генацыд!» — заклікаў палітык.

UPD. Пазней дарадца мэра Марыупаля Пётр Адрушчанка абверг інфармацыю пра знаходжанне пад заваламі мірных жыхароў.

«У зоне вакол «Азоўсталі» ўжо даўно ніхто не хаваецца», — заявіў Пётр Андрушчанка.

«Так, Марыупаль, у прыватнасці зона «Азоўсталі», пад шчыльнай бамбардзіроўкай звышцяжкімі бомбамі. Але ў зоне вакол «Азоўсталі» ужо даўно ніхто не хаваецца, асабліва ў зруйнаваным да таго будынку шпіталя», — распавёў дарадца мэра Марыупаля.

Сітуацыя ў Марыупалі: што вядома

Марыупаль з 1 сакавіка знаходзіцца ў аблозе, рускія пастаянна абстрэльваюць яго, спрабуючы ўзяць горад пад свой поўны кантроль.

Прэзідэнт Уладзімір Зяленскі паведаміў, што ідуць перамовы для таго, каб дапамагчы ўкраінскім абаронцам у Марыупалі.

Ён заявіў, што знішчэнне ўкраінскіх абаронцаў у Марыупалі можа паставіць кропку ў мірных перамовах з Расіяй.

17 красавіка Генштаб паведаміў, што войскі РФ, як мяркуецца, рыхтуюцца да правядзення дэсантнай марской аперацыі ў Марыупалі.

Як паведаміў дарадца мэра Марыупаля Пётр Андрушчанка, у Марыупалі акупанты б'юць бомбамі па «Азоўсталі», страляюць з артылерыі і танкаў па жылым сектары Левабярэжнага раёна.