Літоўская тэлевізія арганізуе дабрачынны марафон у падтрымку беларусаў і ўкраінцаў
Грамадская арганізацыя Blue/Yellow ў супрацы з Літоўскай тэлевізіяй LRT TV і прадусарскай кампаніяй TymDrym 13 студзеня арганізуе дабрачынную акцыю «Разам да перамогі». Імпрэза, якая ладзіцца пяты раз, упершыню акцэнтуе ўвагу на падзеях у Беларусі.
Ланцуг салідарнасці з Беларуссю. Сярод удзельніц экс-прэзідэнтка Літвы Даля Грыбаўскайце
Як адзначаюць арганізатары , асноўная ідэя застанецца ранейшай, але з некаторымі нюансамі.
Па-першае, трагічныя падзеі для Літвы 13 студзеня 1991 года, калі самаахвярнасць літоўцаў прыспешыла прыход дэмакратыі. Па-другое, працяг барацьбы за мір і свабоду ва Украіне, якая вось ужо 7 гадоў знаходзіцца ў стане вайны з сепаратыстамі ды іх расійскімі памагатымі.
Самае істотнае адрозненне сёлетняй імпрэзы ў тым, што гэтым разам таксама будзе ўлічаная сітуацыя ў Беларусі, народ якой змагаецца супраць рэжыму дыктатара Лукашэнкі.
Падчас анлайн-марафону гледачам прапануюць зрабіць ахвяраванні на дапамогу ўкраінскім салдатам, валанцёрам, гарадскім суполкам, пацярпелым ад вайны, а таксама змагарам за свабоду ў Беларусі.
Пачатак трансляцыі на Беларусь дабрачыннай акцыі «Разам да перамогі» — 13 студзеня а 20.30.