Мэр Мелітопаля: тое, што адбываецца на акупаваных Расіяй тэрыторыях, — гэта генацыд і галадамор

Мэр Мелітопаля Іван Фёдараў назваў дзеянні расійскіх акупантаў на ўкраінскіх акупаваных тэрыторыях генацыдам і галадаморам. Такое меркаванне ён выказаў падчас інфармацыйнага тэлемарафона, піша unian.net.

«Хачу пракаментаваць тое, што адбываецца на нашых акупаваных тэрыторыях. Гэта з аднаго боку — генацыд, а цалкам можам параўнаць з галадаморам, які ствараў савецкі рэжым непасрэдна ва Украіне і, вядома, на поўдні краіны», — адзначыў ён.

Ён падкрэсліў, што на сёння дэфіцыту прадуктаў няма, але акупаваныя тэрыторыі сапраўды стаяць на парозе голаду, таму што невядома, што будзе восенню.

«Сёння няма дэфіцыту прадуктаў на нашай тэрыторыі, але цана, па якой рашысты спрабуюць прадаць прадукты, якія завозяць з часова акупаванага Крыму, яна ў тры-чатыры разы вышэй, чым тое, колькі яны каштуюць у Запарожжы, Дняпры ці Кіеве. У нашых людзей сёння няма наяўных сродкаў, бо 80% беспрацоўя непасрэдна на акупаваных тэрыторыях, і ў іх няма доступу да гэтых даволі дарагіх прадуктаў, таму сапраўды, мы сёння стаім на парозе голаду. Я не разумею, што мы будзем рабіць восенню», — распавёў гарадскі галава Мелітопаля.

Акрамя гэтага, ён распавёў аб цяжкіх умовах, у якія акупанты ставяць ўкраінскіх фермераў, фактычна рабуючы іх.

«Каля двух тыдняў таму расійцы пачалі дыскусіі з нашымі фермерамі на часова акупаваных тэрыторыях, і далі ім умовы будучага ўраджаю. Умовы былі наступныя: 70% забіраюць акупанты, 30% даюць магчымасць нашым фермерам прадаць па зніжаных цэнах. Мы выразна разумеем, што 30% па незразумелых цэнах — гэта нават не пакрыццё сабекошту вырашчанай прадукцыі. Таму яны абкрадаюць нашых фермераў, абкрадаюць нашы вёскі», — дадаў гарадскі галава.

Ён выказаў надзею на тое, што Узброеныя сілы Украіны змогуць вызваліць увесь поўдзень і ўсход краіны і аднавіць яе тэрытарыяльную цэласнасць.

Раней Фёдараў распавядаў, што расійскія акупанты цягнікамі вывозяць збожжа з Запарожскай вобласці ў Крым.