У асуджанага ў «ДНР» да смяротнага пакарання мараканца ёсць украінскае грамадзянства

У Брахіма Саадуна з Марока, асуджанага да смяротнага пакарання ў гэтак званай «ДНР», ёсць украінскае грамадзянства, паведамляе Reuters.

Бацька асуджанага Тахар Саадун распавёў, што яго сын атрымаў украінскае грамадзянства ў 2020 годзе пасля праходжання гадавой вайсковай падрыхтоўкі.

Ён заявіў, што яго сын здаўся ў палон добраахвотна, таму павінен утрымлівацца ў статусе ваеннапалоннага нароўні з іншымі байцамі Узброеных Сіл Украіны.

«Наша сям'я пакутуе ад адсутнасці кантакту з адвакатам для абмену юрыдычнай інфармацыяй, і гэта пагаршае нашы выпрабаванні», — сказаў ён.

Мараканская дыпламатычная крыніца ў Кіеве паведаміла, што Саадун быў заключаны ў турму «арганізацыяй, якая не прызнаная ні Марока, ні ААН».

Нагадаем, што так званы «Вярхоўны суд» самаабвешчанай «ДНР» асудзіў трох палонных замежнікаў, якія ваявалі ў складзе УСУ, да смяротнага пакарання. Гаворка ідзе пра двух брытанцаў — Шона Пінера і Эйдэна Эсліна, а таксама грамадзяніна Марока Саадуна Брагіма.

У МЗС Украіны заявілі, што палонныя карыстаюцца правамі ваеннапалонных, таму што падпісалі кантракты з УСУ. Украіна ўжо пачала дасудовае расследаванне па гэтым факце.