Парашэнка назваў перамовы ў Мінску вельмі складанымі
Удзельнікі сустрэчы ў Мінску падтрымалі план мірнага ўрэгулявання сітуацыі ва ўсходніх рэгіёнах Украіны, заявіў прэзідэнт Украіны Пётр Парашэнка па выніках перамоваў, у якіх таксама ўдзельнічалі Еўрасаюз і Мытны саюз. Прэзідэнт Украіны адзначыў, што ў Мінску былі "вельмі складаныя перамовы".
Ён падзякаваў прадстаўнікам ЕС за падтрымку. "Мы прадэманстравалі, што галоўная мэта, з якой мы прыбылі ў Мінск — гэта мір", — сказаў Парашэнка, паведамляе korrespondent.net.
Паводле слоў украінскага лідара, Кіеў і Масква "неадкладна" пачнуць праводзіць кансультацыі паміж пагранічнымі ведамствамі і генеральнымі штабамі абедзвюх краін у кантэксце
ўрэгулявання сітуацыі ва ўсходніх рэгіёнах Украіны.
Парашэнка падкрэсліў, што ўкраінскі бок настойвае на неадкладным вызваленні ўсіх закладнікаў, а таксама на неабходнасці закрыцця мяжы для ўвозу зброі і ваеннай тэхнікі з РФ.
"Будзе распрацавана на базе мірнага плана "дарожная карта", магчыма, праз трохбаковую кантактную групу правядзем кансультацыі, каб як мага хутчэй выйсці на рэжым спынення
агню, які будзе забяспечаны прадстаўнікамі маніторынгавай місіі АБСЕ", — распавёў Парашэнка, дадаўшы, што рэжым спынення агню павінен насіць выключна двухбаковы характар.
У рамках візіту дасягнута дамоўленасць правесці кансультацыі на экспертным узроўні па пытанні эканамічных наступстваў стварэння зоны свабоднага гандлю паміж Украінай і ЕС.
"Дамовіліся аб тым, што 6 верасня пройдуць чарговыя кансультацыі па энергетычных пытаннях пры ўдзеле еўракамісара Этынгера і міністраў паліва і энергетыкі Расіі і Украіны",
— заявіў Парашэнка.
Пуцін і Парашэнка ў Мінску правялі першую двухбаковую сустрэчу, якая працягвалася дзве гадзіны. Да гэтага ў перамовах таксама ўдзельнічалі прэзідэнт Казахстана Нурсултан Назарбаеў, беларускі лідар
Аляксандр Лукашэнка, кіраўнік еўрапейскай дыпламатыі Кэтрын Эштан.