Расія. Політэхнічны музей аштрафавалі за арганізацыю дзіцячых гурткоў

Політэхнічны музей аштрафаваны на 185 тысяч рублёў за арганізацыю дзіцячых адукацыйных гурткоў без ліцэнзіі, паведаміла пракуратура Масквы.

Такое рашэнне было прынята Сіманаўскай міжраённай пракуратурай па выніках праверкі па звароце аб парушэнні правоў непаўнагадовага пры правядзенні заняткаў у навуковым гуртку «Самы юны медык».
У ходзе праверкі, гаворыцца ў паведамленні пракуратуры, было ўстаноўлена, што навукова-адукацыйны праект «Навуковыя лабараторыі», які ўваходзіць у структуру музея, займаецца «адукацыйнай дзейнасцю па дадатковых агульнаадукацыйных праграмах, якая ў адпаведнасці з Федэральным законам Аб адукацыі ў РФ «падлягае ліцэнзаванню».
У Політэхнічнага музея, паведаміла пракуратура, няма ліцэнзіі на ажыццяўленне такой адукацыйнай дзейнасці, і ён не падаваў заяўку на яе атрыманне ў дэпартамент адукацыі Масквы.
Пракуратура распачала ў дачыненні да ФГБУК «Політэхнічны музей» справу аб адміністрацыйным правапарушэнні па ч. 1 арт. 19.20 КаАП (ажыццяўленне дзейнасці, не звязанай з атрыманнем прыбытку, без спецыяльнага дазволу (ліцэнзіі)). Музей быў аштрафаваны, а двое яго супрацоўнікаў прыцягнуты да дысцыплінарнай адказнасці.
Кіраўніцтва Політэхнічнага музея штраф за арганізацыю дзіцячых гурткоў без ліцэнзіі пакуль не пракаментавала.
У рамках адукацыйнага праекта «Навуковыя лабараторыі», паведамляецца на сайце Політэхнічнага музея, працуюць лабараторыі біялогіі, матэматыкі, робататэхнікі, хіміі, фізікі і Дзіцячы лекторый. Пры кожнай з лабараторый дзейнічаюць гурткі, разлічаныя на дзяцей рознага ўзросту.
Паводле meduza.io