Расія сцвярджае, што ў яе тэрытарыяльныя воды зайшла падлодка ЗША: Пентагон гэта адмаўляе

Міністэрства абароны Расіі заявіла, што ваенны карабель «Маршал Шапашнікаў» ужыў спецыяльныя сродкі супраць амерыканскай атамнай падводнай лодкі, якая, паводле сцвярджэнняў расійскага ведамства, зайшла ў тэрытарыяльныя воды краіны ў раёне Курыльскіх астравоў. У Пентагоне настойваюць, што падводныя лодкі ЗША ў расійскія воды не ўваходзілі.

У паведамленні мінабароны Расіі сказана, што інцыдэнт адбыўся 12 лютага ў 10.40 па маскоўскім часе падчас вучэнняў каля вострава Уруп Курыльскай грады. Паводле звестак расійскіх ваенных, там была знойдзена амерыканская падводная лодка класа «Вірджынія». Яе экіпажу загадалі неадкладна ўсплыць, але падлодка патрабаванне не выканала.
«У рэжыме гукападводнай сувязі экіпажу замежнай падводнай лодкі на рускай і англійскай мовах было перададзена паведамленне: "Вы знаходзіцеся ў тэрытарыяльных водах Расіі. Выплыць неадкладна!". Экіпажам амерыканскай падводнай лодкі патрабаванне расійскага боку было праігнаравана», — сказана ў заяве мінабароны.
У мінабароны РФ паведамілі, што пасля гэтага вайскоўцы ўжылі «адпаведныя сродкі», але не ўдакладнілі, пра якія менавіта сродкі ідзе гаворка.
Па версіі міністэрства абароны Расіі, пасля гэтага «амерыканская падводная лодка выкарыстоўвала самаходны імітатар для раздвойвання мэты на сродках радыёлакацыйнага і акустычнага кантролю і з максімальнай хуткасцю пакінула тэрытарыяльныя воды Расійскай Федэрацыі».
Аднак афіцыйны прадстаўнік Інда-Ціхаакіянскага камандавання Узброеных сіл ЗША Кайл Райнс заявіў у суботу ўвечары, што амерыканскія падводныя лодкі ў расійскія воды не ўваходзілі.
«Расійскія сцвярджэнні аб тым, што мы дзейнічаем у іх тэрытарыяльных водах, не адпавядаюць рэчаіснасці, — сказаў ён. — Я не буду даваць каментары адносна дакладнага месцазнаходжання нашых падводных лодак, але мы лятаем, плаваем і бяспечна дзейнічаем у міжнародных водах».
Расійскае ваеннае ведамства паведамляе, што ў сувязі з тым, што адбылося, улады выклікалі ў мінабароны аташэ па пытаннях абароны пры пасольстве ЗША ў Маскве. Масква расцаніла інцыдэнт як «грубае парушэнне нормаў міжнароднага права» і заявіла, што дзеянні падводнай лодкі «стварылі пагрозу нацыянальнай бяспецы Расійскай Федэрацыі».
Інцыдэнт каля Курыльскіх астравоў прайшоў на фоне рэзкага абвастрэння адносін Расіі з краінамі Захаду з-за сітуацыі вакол Украіны. ЗША і іншыя краіны НАТА сцвярджаюць, што Масква сабрала на ўкраінскіх межах беспрэцэдэнтна вялікую колькасць войскаў і рыхтуецца да ўварвання. Расія настойвае, што такіх планаў у яе няма, аднак патрабуе ад Захаду «гарантый бяспекі».
bbc.com