Супрацоўнікі расійскай Lenta.ru апублікавалі матэрыял пра «вартага жалю дыктатара Пуціна» і іншыя крытычныя тэксты

На расійскім прапагандысцкім сайце Lenta.ru з'явіліся больш за дзесяць матэрыялаў з крытыкай Уладзіміра Пуціна і вайны ва Украіне. Хоць зараз яны ўжо зніклі з сайта, копія галоўнай старонкі захавалася ў вэб-архіве. Паведамляецца, што гэта зрабілі не хакеры, а самі супрацоўнікі рэдакцыі.

Сёння на сайце з'явіліся навіны з загалоўкамі «Пуцін развязаў адну з кровапралітных войнаў 21 стагоддзя», «Уладзімір Пуцін ператварыўся ў бездапаможнага дыктатара і параноіка», «Расійская эліта хворая на кумаўство і падлізніцтва», а таксама артыкул «Вайной лягчэй прыкрыць правалы ў эканоміцы. Пуцін павінен сыйсці. Ён развязаў бессэнсоўную вайну і вядзе Расію ў бездань».

Скрыншот з сайта lenta.ru
Усе яны пачыналіся з дысклеймера аб тым, што «гэты матэрыял не ўзгоднены з кіраўніцтвам, а за яго публікацыю Адміністрацыя прэзідэнта раздасць выданню на арэхі». У постскрыптуме да артыкулаў за публікацыю бралі адказнасць кіраўнік аддзелаў «Эканоміка» і «Асяроддзе пасялення» Ягор Палякоў і рэдактар ​​гэтых аддзелаў Аляксандра Мірошнікава.

Крыніца «Медыязоны» ў выданні пацвердзіла, што гэта зрабілі іх супрацоўнікі, замяніўшы тэкст у іншых ужо апублікаваных навінах.