У Брытаніі створана падраздзяленне па барацьбе з крамлёўскай дэзінфармацыяй

У Вялікабрытаніі па распараджэнні кіраўніка МЗС Ліз Трас створана новае ўрадавае падраздзяленне па барацьбе з крамлёўскай дэзінфармацыяй. Пра гэта паведамляе газета Telegraph.

Гэтая зводная працоўная група пад назвай «Урадавая інфармацыйная ячэйка» (Government Information Cell, GIC) была створана ў лютым, перад самым уварваннем Расіі на тэрыторыю Украіны, і каардынуецца двума ведамствамі — міністэрствам замежных спраў і міністэрствам абароны.
У склад падраздзялення ўвайшлі 35 супрацоўнікаў МЗС, МУС, міністэрствы абароны і іншых урадавых структур.
У задачы GIC уваходзіць аналіз выходнай ад Масквы дэзінфармацыі, кансультаванне міністэрстваў і ведамстваў і падрыхтоўка справаздач для рассылання саюзнікам па НАТА і з ЕС, а таксама членам альянсу разведак «Пяць вачэй» (акрамя самой Брытаніі гэта Аўстралія, Канада, Новая Зеландыя і ЗША).
Акрамя таго, як піша Telegraph, брытанцы вырашылі, што, калі расійскія ўлады заблакавалі «Фэйсбук» і «Твітар», а большасць расійцаў з прадузятасцю ставіцца да інфармацыі напрамую ад брытанскіх уладаў, то трэба паспрабаваць правесці заявы афіцыйных асобаў Брытаніі ў выглядзе рэкламы, у прыватнасці, у сацыяльнай сетцы VK і іншых.
Якім чынам брытанцы збіраюцца нават у форме рэкламы выслізгваць ад увагі расійскай цэнзуры ў асобе Раскамнагляду, Telegraph не тлумачыць.