У Германіі распачалі больш за 140 спраў з-за літары Z

Паліцыя і пракуратура Германіі адкрылі больш за 140 спраў з-за адабрэння вайны Расіі супраць Украіны. Прычына большасці з іх: выкарыстанне літары Z, якая стала сімвалам поўнамаштабнага расійскага ўварвання ва Украіну.

Адбываецца гэта так: напрыклад, хтосьці наклеіў гэтую літару на свой аўтамабіль — гэта падпадае пад артыкул 140 Крымінальнага кодэкса Германіі аб публічным заахвочванні або адабрэнні супрацьпраўных дзеянняў. Пакаранне па ёй: штраф або да трох гадоў пазбаўлення волі.

Верагодней за ўсё, спраў адкрыта на пару дзясяткаў больш, чым 140: некаторыя рэгіёны заводзяць іх, але не вядуць асобную статыстыку менавіта па гэтай вайне, аднак запэўніваюць, што прымаюць меры. У тым ліку і супраць тых, хто ўдзельнічаў у прарасійскіх аўтапрабегах у Германіі і выкарыстаў пры гэтым не толькі сцягі РФ і СССР, але і сімволіку вайны.

Паводле unian.net.