У Грэцыі бушуюць лясныя пажары. Тысячы людзей эвакуіраваны, авіякампаніі адмяняюць рэйсы

Лясны пажар у цэнтральнай і паўднёвай частцы вострава Родас бушуе з аўторка. Гэта найбуйнейшы з мноства пажараў у Грэцыі праз анамальную спякоту, якая, на думку экспертаў, можа стаць самай працяглай у краіне за ўсю гісторыю назіранняў.

Буйны лясны пажар, які ахапіў грэцкі востраў Родас, вымусіў тысячы турыстаў пакінуць свае гатэлі.

На фотаздымках па грэчаскім тэлебачанні бачныя пажары і дым каля дамоў і пляжаў на Родасе, а на відэа, размешчаных у сацыяльных сетках, відаць, як вялікія групы турыстаў эвакуююць з гатэляў пешшу.

Па даных Асацыяцыі гатэляў Родаса, у суботу каля 10 000 турыстаў былі дастаўлены ў паўночную частку выспы. Асацыяцыя паведаміла па грэчаскім тэлебачанні, што турыстаў з 12 гатэляў перавозілі аўтобусамі, пешшу і па моры.

Свае дамы пакідаюць жыхары вострава. Па паведамленнях, каля 19 000 чалавек былі эвакуіраваны па сушы і па моры.

Па словах прадстаўнікоў МНС, восем чалавек шпіталізаваныя з рэспіраторнымі захворваннямі. Аб загінулых або сур'ёзных траўмах не паведамляецца.

Турыстычныя кампаніі Tui і Jet2 прыпынілі ўваходныя турыстычныя рэйсы на Родас, а EasyJet адмяніла пакетныя туры, але працягвае свае рэйсы.

Па прагнозах, сёння вецер узмоцніцца, што можа яшчэ больш раздзьмуць полымя. Дым будзе па-ранейшаму ісці ў бок курортаў на ўсходні бок выспы.

Паводле звестак Міністэрства грамадзянскай абароны Грэцыі, 13 дэпартаментаў, у тым ліку рэгіён Атыка, дзе размешчаная сталіца Афіны, у нядзелю абвясцілі стан павышанай гатоўнасці праз лясныя пажары, што з'яўляецца найвышэйшым узроўнем трывогі праз надзвычайную рызыку ўзгарання.

У Афінах гадзіны наведвання Акропаля і іншых археалагічных помнікаў былі перагледжаны з-за рэзкага павышэння тэмпературы. Персанал на некаторых аб'ектах страйкуе ў знак пратэсту супраць умоў працы.

«Верагодна, мы перажывем ад 15 да 16 дзён моцнай спёкі, чаго ніколі раней не было ў нашай краіне», — сказаў CNN дырэктар па даследаваннях Нацыянальнай абсерваторыі Афін Костас Лагувардас.

Па словах Лагувардаса, самая доўгая бесперапынная хваля цяпла, з якой сутыкнулася Грэцыя, доўжылася 12 дзён у ліпені 1987 года.

Паводле яго, тэмпература ў Афінах гэтым летам можа пабіць рэкорд горада, які быў усталяваны ў чэрвені 2007 года, калі ў Афінах было зарэгістравана 44,8 градуса па Цэльсію.

Спёка ў Еўропе

У вялікіх частках Паўночнага паўшар'я назіраліся экстрэмальныя тэмпературы, а ў Еўропе адбываліся рэзкія пераходы ад адной формы экстрэмальнага надвор'я да іншай.

Выратавацца ад хвалі спякоты. Дасье ў карыкатурах

У ноч на сераду на паўночны рэгіён Італіі Венета абрынуўся град памерам з тэнісны мяч, у выніку чаго прынамсі 110 чалавек атрымалі раненні. Службы экстранай дапамогі адрэагавалі на больш за 500 зваротаў па дапамогу ў сувязі з пашкоджаннем маёмасці і цялеснымі пашкоджаннямі, паведаміла рэгіянальная служба грамадзянскай абароны Венета.

Краіна таксама перажыла рэкордную спякоту: у аўторак у сталіцы Рыме ўсталявалася новая высокая тэмпература — 41 градус па Цэльсію. Раней у гэтым годзе краіна пацярпела ад разбуральнай паводкі.

На Балканах моцныя навальніцы, якія абрынуліся ў сераду, забралі некалькі жыццяў.

Прагнозы навукоўцаў

Навукоўцы папярэджваюць, што экстрэмальнае надвор'е можа быць толькі прадвеснікам таго, што адбудзецца, калі планета пацяплее.

«Экстрэмальныя ўмовы надвор'я будуць працягваць станавіцца ўсё больш інтэнсіўнымі, і нашы ўмовы надвор'я могуць змяніцца так, як мы пакуль не можам прадказаць», — сказаў CNN Пітэр Стотт, навуковы супрацоўнік па атрыбуцыі клімату ў Метэабюро Вялікабрытаніі.

А ў Беларусі — дажджы

У апошні тыдзень ліпеня будзе халадней, чым чакаецца ў сярэдзіне лета. Тэмпература паветра не паднімецца вышэй за норму, пройдуць дажджы і навальніцы з парывістым ветрам, распавёўДзмітрый Рабаў.

У пачатку наступнага тыдня амаль на ўсёй тэрыторыі Беларусі будзе воблачна. Часам чакаюцца кароткачасовыя дажджы і навальніцы, вільготнасць складзе да 90%. Тэмпература ноччу ад +10 да +16°C, днём у панядзелак ад +19 да +25°C. У аўторак у Брэсцкай вобласці будзе ад +18°C, у Гомельскай да +30°C.

У сярэдзіне тыдня пройдуць кароткачасовыя дажджы, навальніцы, па паўднёвым усходзе дажджы будуць моцныя. Уначы ў сераду тэмпература будзе ад +9 да +14°C, удзень ад +18 да + 23°C.

У другой палове тыдня будуць ісці дажджы, месцамі навальніцы. Уначы і раніцай слабы туман з бачнасцю да 1 км. Уначы тэмпература ад +8 да +13°C. удзень у чацвер — да +20°C, у пятніцу ад +15 да +23°C.