У Польшчы затрымалі 13 чалавек, якія руйнавалі агароджу на мяжы з Беларуссю

Салдаты Пагранічнай варты Польшчы і вайскоўцы затрымалі групу з 13 чалавек — 12 палякаў і аднаго галандца, якія разбуралі загароды, што будуюцца на мяжы з Беларуссю. Пра гэта ў нядзелю, 29 жніўня, прадстаўнікі пагранслужбы паведамілі ў Twitter.

Пры гэтым яны дадалі, што "сярод затрыманых — Барташ К.". У адпаведнасці з польскімі законамі прозвішча затрыманага не называецца. Па некаторых даных, гаворка можа ісці пра актывіста фонду "Адкрыты дыялог" — Барташа Крамеке.
Працягваюцца следчыя дзеянні з мэтай прад'яўлення абвінавачванняў названай групе асоб.

Міністр унутраных спраў і адміністрацыі Польшчы Марыюш Каміньскі ў Twitter ахарактарызаваў сітуацыю на мяжы як "абсалютна непрымальную". Па словах міністра, парушальнікі панясуць крымінальнае пакаранне. "Мы будзем рэагаваць на падобныя дзеянні з поўнай рашучасцю", — падкрэсліў Каміньскі.


Міністр нацыянальнай абароны Польшчы Марыюш Блашчак 24 жніўня заявіў у інтэрв'ю сетцы радыёстанцый Polskie Radio, што Варшава пабудуе плот уздоўж мяжы з Беларуссю вышынёй 2,5 метра. Такім чынам дзяржава - член ЕС хоча абараніць сябе ад наплыву нелегальных мігрантаў з краін Блізкага Усходу і Афганістана, якія пранікаюць у краіну з суседняй Беларусі.
Па словах Блащака, інжынеры узброеных сіл Польшчы ўжо спраектавалі загараджальнае збудаванне. Яго ўзвядзенне будзе ажыццяўляцца вайскоўцамі, дадаў ён. Для ажыццяўлення работ да мяжы з Беларуссю, працягласць якой перавышае 400 кіламетраў, павінны былі быць перакінутыя дадаткова да 1 тысячы салдат.
Паводле dw.com