Амаль у два разы больш беларусы адкрылі фірмаў у Польшчы за 2022 год у параўнанні з 2021

Нашы грамадзяне адкрылі ў Польшчы 1745 новых кампаній, гэта ў два разы больш, чым у 2021, піша Оffice Life на падставе звестак польскага Галоўнага цэнтра эканамічнай інфармацыі. Гэта гістарычны рэкорд.

Усяго ж на 10 студзеня 2023 г. у Польшчы дзейнічала 4980 бізнэсаў з беларускім капіталам. За 2022 прырост склаў 35%.
Што гэта за кампаніі? У лідэрах — аўтатранспартны бізнес. У мінулым годзе, на фоне закрыцця еўрапейскіх межаў для перавозчыкаў з Беларусі, у суседняй Польшчы адкрылася амаль у два разы больш такіх кампаній, дзе сярод заснавальнікаў — юрыдычная або фізічная асоба з Беларусі.
У тройцы самых папулярных таксама будаўнічыя кампаніі і IT-бізнэс. У два разы больш стала кампаній, якія займаюцца аздабляльнымі працамі, прабіліся ў топ-10 цырульні і касметычныя салоны.
Геаграфічныя прыярытэты беларусаў — Варшава і Беласток.
Як правіла, новыя заснавальнікі аддаюць перавагу ўкладвацца ва ўжо засвоеных першымі хвалямі інвестараў рэгіёнах.
Для беларусаў у прыярытэце заўсёды былі сталічнае Мазавецкае і два ўсходнія ваяводствы — Падляскае і Люблінскае. На гэтую тройку прыпадае больш за 70% усіх зарэгістраваных у Польшчы бізнэсаў.
Адміністрацыйныя цэнтры Варшава, Беласток і павятовы горад Бяла-Падляска ў Люблінскім ваяводстве займаюць першыя тры месцы і сярод гарадоў, у якіх найчасцей прапісваюцца інвестары з Беларусі. На пачатак 2023 года ў Варшаве дзейнічалі 2362 кампаніі, у Беластоку - 574 і Бяла-Падлясцы - 276.