Дзяржбюджэт за студзень-травень стаў поўнасцю дэфіцытны

У студзені-траўні дзяржаўны бюджэт Беларусі быў выкананы з дэфіцытам. Паводле звестак Мінфіна, дэфіцыт бюджэту сектара дзяржаўнага кіравання за пяць месяцаў склаў 210,9 млн рублёў, а рэспубліканскага бюджэту — крыху больш за 1 млрд рублёў.

У студзені-красавіку бюджэт сектара дзяржкіравання быў прафіцытным. Даходы перавышалі выдаткі на 1,03 млрд рублёў. Дэфіцыт рэспубліканскага бюджэту па выніках чатырох месяцаў складаў 134,9 млн рублёў, нагадвае REFORM.by.

Даходы бюджэту сектара дзяржкіравання ў студзені-траўні склалі 27,26 млрд рублёў, у тым ліку было атрымана 1,5 млрд рублёў падатку на прыбытак, 6,5 млрд ПДВ, 1,67 млрд рублёў акцызаў і 1,18 млрд рублёў даходаў ад знешнеэканамічнай дзейнасці. Паступленні ў ФСАН склалі 8,7 млрд рублёў.

Выдаткі бюджэту сектара дзяржкіравання склалі 27,47 млрд рублёў, у тым ліку на агульнадзяржаўную дзейнасць вылучылі 4,73 млрд рублёў, на эканоміку выдаткавалі 3,14 млрд рублёў, на сацыяльную сферу — 8,72 млрд рублёў. Выдаткі ФСАН склалі 8,4 млрд рублёў.

Мінфін не мяняў прагноз бюджэтнага дэфіцыту па выніках года. Ацэнка гадавога дэфіцыту бюджэту сектара дзяржкіравання складае 4,14 млрд рублёў, а рэспубліканскага бюджэту — 4,29 млрд рублёў.