Рынак працы ў кастрычніку: звольненых зноў больш, чым узятых

У кастрычніку звольнілася людей зноў больш, чым знайшло працу. Занятасць падае як па натуральных дэмаграфічных прычынах, так і цалкам рукатворных. Вельмі дрэнна склалася са звальненнямі ў кастрычніку ў будаўнічай сферы.

Пасля добрых навін наконт рынку працы ў верасні новыя звесткі аб прынятых і звольненых у Беларусі ў кастрычніку чарговым разам негатыўныя. У ключавых галінах за месяц колькасць звольненых з працы перавысіла колькасць нанятых, піша праект «Вашы грошы».

Усяго з пачатку года адток кадраў ужо перавысіў 56 тысяч чалавек. Аднак дынаміка прынятых і звольненых у кастрычніку для шэрагу галін яшчэ пазітыўная. Дзесьці дапамагае сезоннасць, дзесьці — кан'юнктура рынку.

У кастрычніку колькасць прынятых на працу склала 59,8 тысячы, а звольненых — 60,2 тысячы. У выніку перавышэнне звальненняў над наймам склала 350 чалавек.

Па рэгіёнах сітуацыя склалася па-рознаму. Горш за ўсё ў сталіцы, дзе звольнілі на 1,2 тысячы больш, чым прынялі на працу. Звальненні перавысілі наём, акрамя таго, у Віцебскай (-0,1 тысячы чалавек), Гродзенскай (-0,5 тысячы) і Магілёўскай (-0,1 тысячы) абласцях. У астатніх абласцях сітуацыя склалася лепшым чынам: Брэсцкая (+0,7 тысячы), Гомельская (+0,6 тысячы), Мінская (+0,3 тысячы).

Разгледзім, як складваецца сітуацыя на рынку працы па асобных галінах.

У сферы прамысловасці ў кастрычніку наём перавышаў звальненні. Традыцыйны восеньскі набор зрушыўся ў параўнанні з мінулым годам на месяц і аказаўся ўдвая ніжэйшым па аб'ёме. Пра тое, наколькі горшая цяпер сітуацыя ў ключавой сферы беларускай эканомікі, чым годам раней, будзе зразумела па лістападзе, калі стане ясна, быў рост у кастрычніку разавым або стаў пачаткам аднаўлення. 

Працягнуўся адток у сферы «Інфармацыя і сувязь». Перавышэнне звальненняў над найманнем тут склала 391 чалавек. Цяпер гэта мінімальная велічыня чыстага адтоку, а яшчэ годам раней паказчык перавышаў тысячу чалавек.

Аднак варта ўлічыць, што Белстат перастаў публікаваць дэталёвыя звесткі асобна ў сферы IT. З-за гэтага зразумець рэальныя маштабы адтоку непасрэдна айцішнікаў складаней.

Можна меркаваць, што прыгожую карціну цалкам могуць з часам намаляваць за кошт адрозных ад IT сфер, якія ўваходзяць у групу «Інфармацыя і сувязь», а затым выдаць за аднаўленне занятасці высокатэхналагічнага драйвера эканомікі. 

Колькасць беларускіх чыноўнікаў у кастрычніку павялічылася на рэкордныя за год 105 чалавек. Іх стала больш ва ўсіх абласцях: Брэсцкай (плюс 7 чалавек), Віцебскай (плюс 28 чалавек), Гомельскай (плюс 87 чалавек), Гродзенскай (плюс 12 чалавек), Мінскай (плюс 11 чалавек), Магілёўскай (плюс 7 чалавек). Выключэнне склала сталіца (мінус 47 чалавек).  

Сфера гандлю ў кастрычніку страціла 0,6 тысячы чалавек. Адток зноў паскорыўся, а годам раней у сферы яшчэ назіраўся рост.

Больш за ўсё перавышэнне звальненняў над найманнем назіраецца ў рознічным гандлі, крыху меншы адток у аптовай сферы.

А вось гандаль і рамонт аўто, наадварот, цяпер набірае персанал. Але гэты прырост не мяняе агульнай карціны ў сферы гандлю. 

Вельмі дрэнна склалася карціна звальненняў і найму ў кастрычніку ў будаўнічай сферы. Тут звальненні перавысілі наём на рэкордныя за апошні час 1,9 тысячы чалавек. Больш за ўсё звальняла сталіца. Тут, пры наборы на працу ў 812 чалавек, кастрычніцкія звальненні склалі 1463 чалавекі. У іншых рэгіёнах перавышэнне звальненняў над найманнем склала ад 142 чалавек у Магілёўскай вобласці да 328 у Брэсцкай.

У транспартнай сферы сітуацыя не мяняецца — сфера актыўна губляе кадры. За кастрычнік звольнілі на 595 чалавек больш, чым прынялі. Больш за ўсё скарачэнняў у сталіцы, дзе канцэнтруюцца асноўныя транспартныя кампаніі.

Пакуль паляпшэння стану спраў на межах не прадбачыцца, стагнацыя сферы будзе працягвацца.

Цікава, што агульны рост эканомікі не ўплывае на занятасць у транспартнай сферы. Пры росце ВУП, выпуску большага аб'ёму прадукцыі сітуацыя павінна была б быць не такой драматычнай. І гэта прымушае задумацца аб праблемах у статыстыцы.

Пакуль відавочна, што сітуацыя з рынкам працы, нягледзячы на ўсе намаганні чыноўнікаў, застаецца негатыўнай. Занятасць падае як па натуральных дэмаграфічных прычынах, так і цалкам рукатворных. Пакуль многія з агучаных спосабаў вырашэння кадравай праблемы прыводзяць да адваротнага эфекту і толькі ўзмацняюць адток кадраў.