У Беларусі ўзаконілі пірацтва — але толькі з «недружалюбных» краін

Улады ўзаконілі паралельны імпарт і інтэлектуальнае пірацтва. Цяпер гэта не злачынства, бо робіцца з добрымі намерамі — выключна дзеля «развіцця інтэлектуальнага і духоўна-маральнага патэнцыялу грамадства»!

Цяпер кампутарныя праграмы, фільмы, музычныя творы, тэлеперадачы ў Беларусі можна выкарыстоўваць — і не пытацца дазволу ў праваўладальнікаў. Новы закон «Аб абмежаванні выключных правоў на аб'екты інтэлектуальнай уласнасці» дазваляе гэта, калі праваўладальнікі — з «краін, якія здзяйсняюць недружалюбныя дзеянні» супраць Беларусі, піша «Нямецкая хваля».

Сярод мэтаў закона пазначаецца «развіццё інтэлектуальнага і духоўна-маральнага патэнцыялу грамадства, забеспячэння доступу да дасягненняў сусветнай культуры і падзеяў сучаснага жыцця».

Таксама дазваляецца паралельны імпарт — дапускаецца ўвоз тавараў без дазволу праваўладальнікаў з «замежных дзяржаў, у тым ліку тых, якія здзяйсняюць недружалюбныя дзеянні», калі гэтыя тавары з'яўляюцца важнымі для ўнутранага рынку.

Закон пачынае дзейнічаць з 16 студзеня і збіраецца працаваць да 31 снежня 2024 года.