У топ-30 найбуйнейшых геймдэў-кампаній Украіны — тры з беларускімі каранямі

Беларускі IT-распрацоўшчык і выдавец Wargaming, які мае офіс у Кіеве, увайшоў у першую пяцёрку найбуйнейшых працадаўцаў ва ўкраінскай геймдэў-індустрыі, паведамляе «Еженедельник».

Згодна з апублікаваным рэсурсам DOU.ua рэйтынгу найважнейшых гульцоў гэтага рынку, у лістападзе 2021 года ва ўкраінскім падраздзяленні аднаго з найбуйнейшых сусветных гульнявых холдынгаў было занята 556 чалавек. З гэтым паказчыкам Wargaming Group, якой валодае адзін з самых уплывовых і паспяховых бізнэсоўцаў Беларусі Віктар Кіслы, заняла пятае месца. Больш геймдэў-каманды ва Украіне толькі ў Playrix (1520 чалавек), Ubisoft (1211), Plarium (883) і Gameloft (600).

Трынаццатае месца ў спісе заняла прадуктовая Кампанія Genesis, у Кіеўскім офісе якой цяпер працуюць 230 чалавек. Яна з'яўляецца часткай аднайменнага IT-холдынгу, які стварылі ўкраінцы Уладзімір Мнагалетні і Васіль Ульянаў. У 2010-х да іх далучыўся выхадзец з каманды вядомага беларускага IT-прадпрымальніка Юрыя Зісера Віталь Лапцёнак. Ён адказваў за медыйнае падраздзяленне ў холдынгу (запуск парталаў у краінах Афрыкі і Лацінскай Амерыкі), а потым стаў партнёрам заснавальнікаў у шэрагу прадуктовых праектаў (BetterMe) і ў венчурным фондзе, які з гэтага года называецца Flyer One Ventures. У партфелі фонду, дарэчы, ёсць беларускі стартап-відэарэдактар Vochi.

Нарэшце, трэці ўдзельнік украінскага топу з каранямі з Беларусі — гэта распрацоўшчык і выдавец мабільных праграмаў Gismart. Яго кіеўскі офіс адкрыты каля двух гадоў таму, і ў ім занята цяпер 100 чалавек. Кампанія, уладальнікамі якой Дзмітрый Ліпніцкі і Аляксандр Мінец, заняла 25-ы радок.