20-гадовую «тэрарыстку» Дануту Пярэдня пачнуць судзіць 24 чэрвеня

Праваабаронцам стала вядома, што у пятніцу, 24 чэрвеня, у Кіраўску пачнецца судовы працэс па справе былой студэнткі МДУ імя Куляшова Дануты Пярэдня. Ёй інкрымінуюць два артыкулы Крымінальнага кодэксу — ч.3. арт. 361 (Заклікі да мер абмежавальнага характару (санкцый), іншым дзеянням, накіраваным на прычыненне шкоды нацыянальнай бяспецы Беларусі) і ч.1 арт. 368 (Абраза Лукашэнкі).

У віну дзяўчыне паставілі тое, што яна перапосціла ў адзін з чатаў тэкст, у якім у рэзкай форме крытыкаваліся дзеянні Пуціна і Лукашэнкі па развязванні вайны ва Украіне. Таксама там змяшчаўся заклік да вулічных выступаў і канстатавалася адсутнасць перспектыў у беларускай арміі ў выпадку яе ўступлення ў вайну.

Данута была студэнткай-выдатніцай, аднак адразу пасля ўзбуджэння справы яе адлічылі.

Нагадаем, 10 чэрвеня КДБ абнавіў спіс «асоб, якія маюць дачыненне да тэрарыстычнай дзейнасці» — туды дадалі 9 чалавек, сярод якіх была і Данута.