Адвакаты выступілі з заявай у падтрымку Максіма Знака і Іллі Салея. Пад ёй ужо падпісаліся каля 1800 чалавек

Адвакаты і юрысты Беларусі выступілі з адкрытай заявай у сувязі з затрыманнем 9 верасня іх калегаў Максіма Знака і Іллі Салея. Пад зваротам ужо каля 400 подпісаў, паведамляе «Свабода».

«Мы, адвакаты і юрысты Рэспублікі Беларусь, якія падпісалі гэты зварот, цвёрда перакананыя, што падставы для пераследу нашых калегаў адваката Максіма Знака і адваката Іллі Салея адсутнічаюць», сказана ў заяве.

У ёй згадваюцца прафесійныя заслугі Максіма Знака і Іллі Салея і падкрэсліваецца, што ў сваіх дзеяннях, вусных і пісьмовых паведамленнях яны ніколі:

•     не заклікалі да захопу дзяржаўнай улады або гвалтоўнай змены канстытуцыйнага ладу Рэспублікі Беларусь, або іншых дзеянняў, накіраваных на прычыненне шкоды нацыянальнай бяспецы Рэспублікі Беларусь;
•     не звярталіся з мэтай учынення гэтых дзеянняў да замежных дзяржаваў, замежных або міжнародных арганізацый;
•     не распаўсюджвалі матэрыялы, якія змяшчаюць названыя вышэй заклікі.

У заяве падкрэсліваецца, што адвакацкая супольнасць Беларусі цяпер «востра адчувае, як хутка падае прэстыж прафесіі адваката», адвакаты зазнаюць пераслед і ціск з боку сілавых структур у сувязі са сваёй прафесійнай дзейнасцю і «ўжо не могуць паўнавартасна і бяспечна выконваць свае прафесійныя абавязкі».

Адвакаты патрабуюць:

•     Неадкладна вызваліць Максіма Знака і Іллю Салея.
•     Спыніць ціск на адвакатаў Беларусі і выконваць закон «Аб адвакатуры і адвакацкай дзейнасці ў Рэспубліцы Беларусь».
•     Не перашкаджаць рэалізацыі грамадзянам Беларусі свайго права на карыстанне юрыдычнай дапамогай (арт. 62 Канстытуцыі)

    Спыніць пераслед адвакатаў, якія, рэалізуючы канстытуцыйнае права на свабоднае выказванне меркаванняў і перакананняў (арт. 33 Канстытуцыі), выказваюць сваё меркаванне ў рамках прафесійнай дзейнасці.

На момант публікацыі пад заявай падпісаліся ўжо каля 400 чалавек.