Адвядзем бяду ад Курапатаў

Грамадзянская ініцыятыва «Эксперты ў абарону Курапатаў» звярнулася да суайчыннікаў напярэдадні адкрыцця рэстарацыі «Паедзем, паядзім» ля Народнага мемарыялу.

Чарговая бяда, якая шмат гадоў пільнавала Курапаты з пачатку будаўніцтва рэстаранна-забаўляльнага комплекса пад абразлівым імем “Бульбаш-хол”, гатовая выбухнуць. У канцы тыдня за 50 метраў ад нацыянальнага некропалю запланаванае адкрыццё рэстарацыі — ужо пад заліхвацкай назвай “Паедзем, паядзім”.
Не можа быць радасці ад такой паездкі і такога застолля каля гэтага святога для кожнага суайчынніка месца, дзе ў даваенныя гады забілі тысячы найлепшых сыноў і дачок Беларусі — самых працавітых, таленавітых і адукаваных.
Адкрыццё рэстарацыі каля Курапатаў зганьбіць усіх нас — чыноўнікаў, прадпрымальнікаў і грамадскасць. Першых — бо дазволілі скараціць ахоўную зону Курапатаў, каб узаконіць будаўніцтва “Бульбаш-холу”. Бізнесоўцаў — бо дзеля грошай спакусіліся на гэты ласы кавалак зямлі ля кальцавой дарогі. Грамадскасць — за тое, што не знайшла ў сабе сілаў абараніць курапацкія пагоркі, дзе не з сваёй волі ляжаць нашыя продкі.
Дапусціць адкрыццё рэстарацыі ля Курапатаў — зваліцца ў бездань небыцця.
І каб потым сорам не з’еў нашыя душы, звяртаемся да лепшага, што ёсць у кожнага з нас — разам адвядзем бяду ад Курапатаў!