Акцёры мінскага Новага драматычнага тэатру абвясцілі страйк

Ліст пра далучэнне да агульнанацыянальнага страйку падпісалі 12 чалавек: дзевяць акцёраў (усяго ў трупе больш за два дзясяткі чалавек) і тры супрацоўнікі тэатру. 27 кастрычніка у тэатры прайшоў сход.

«Мы напісалі ліст і перадалі яго дырэктару тэатра Васілю Мартецкаму. У лісце змяшчалася інфармацыя, што мы далучаемся да агульнанацыянальнага страйку», — паведаміў акцёр тэатру Андрэй Бібікаў парталу Tut.by.

Акцёры, якія падпісалі ліст, адмовіліся выйсці на сцэну ў спектаклі «Бонусны сеанс псіхааналізу», які павінен быў адбыцца 27 кастрычніка.

«Мы не выйдзем на сцэну і заўтра, і паслязаўтра. Зараз мы ў падвешаным стане. Нам нічога не сказалі. Ці звольняць нас — невядома. Але, на жаль, усё да гэтага ідзе» — паведаміў Андрэй Бібікаў.

Новы драматычны тэатар Мінску вядзе сваю гісторыю ад тэатра-студыі «Дзе-Я?», які ўзнік у 1987 годзе. Ён набыў статус дзяржаўнага гарадскога тэатру сталіцы ў 1992 годзе.

Гэта адзіны дзяржаўны калектыў, які працуе не ў цэнтры Мінска, а ў адным з раёнаў — на вуліцы Лізы Чайкінай, непадалёк ад метро «Аўтазаводзкая».