БЧБ-сцяг, які мэр Рыгі павесіў падчас ЧС па хакеі, прадалі на аукцыёне за вялікія грошы

28 кастрычніка завяршыўся аўкцыён на Ebay, на якім быў прададзены бел-чырвона-белы сцяг. Той самы, які кіраўнік МЗС Латвіі і мэр Рыгі паднялі замест афіцыйнага дзяржаўнага чырвона-зялёнага падчас правядзення ў сталіцы Латвіі адабранага ў Беларусі чэмпіянату свету па хакеі.

Гэта адбылося 24 траўня, калі мэр Стакіс разам з міністрам Рынкевічсам прыехалі ў цэнтр Рыгі са сваім сцягам у якасці рэакцыі на вымушаную пасадку рэйса «Ryanair» з Афін у Вільню ў Мінску, нагадвае telegraf.by.

Гэты БЧБ-сцяг з выявай гістарычнага герба беларусаў «Пагоня» быў прададзены на аўкцыёне за 12 600 долараў.

Усяго была зроблена 41 стаўка. Літаральна за гадзіну да заканчэння аўкцыёна цана складала каля 6 000 долараў.

Усе сродкі, атрыманыя ад продажу БЧБ-сцяга з памятным подпісам, будуць пералічаныя ў «Беларускі фонд спартыўнай салідарнасці».