Беларусь атрымала найгоршую ацэнку ў глабальным рэйтынгу грамадзянскіх свабод
Беларусь прызнаная адзінай «закрытай» краінай Еўропы ў справаздачы міжнароднай некамерцыйнай арганізацыі CIVICUS аб стане свабод грамадзянскай супольнасці ў свеце. Такі ж рэйтынг маюць, напрыклад, Сірыя і Іран.
Міжнародная некамерцыйная арганізацыя CIVICUS пагоршыла рэйтынг Беларусі з пункту гледжання грамадзянскіх свабод. Яе ацэнка, як вынікае са штогадовай справаздачы арганізацыі, апублікаванай у сераду, 8 снежня, паніжаная з «рэпрэсаванай» да «закрытай».
«Закрытая» — найгоршы рэйтынг, які можа атрымаць краіна ад CIVICUS Monitor. На самай справе гэта азначае, што ў Беларусі пераважае атмасфера страху і гвалту, людзей рэгулярна саджаюць у турмы і падвяргаюць нападам за ажыццяўленне іх грамадзянскіх правоў на свабоду асацыяцыі, сходаў і выказвання меркавання, гаворыцца ў дакуменце.
Арганізацыя канстатавала хуткае пагаршэнне абароны грамадзянскіх свабодаў у Беларусі ў апошні час, выказаўшы занепакоенасць «працяглымі рэпрэсіямі супраць антыўрадавых дэманстрантаў, якія выйшлі на вуліцы ў мінулым годзе». У справаздачы адзначаецца, што ў цяперашні час у Беларусі налічваецца каля 900 палітвязняў.
«Свабода асацыяцыі практычна не існуе ў Беларусі, і многія актывісты, апазіцыі і крытыкі ўрада былі вымушаныя пакінуць краіну, каб пазбегнуць пераследаў і нават смерці», — адзначаецца ў «People Power Under Attack 2021».
«Пры Лукашэнку проста няма месца для нязгодных, а свабода выказвання меркавання жорстка душыцца. У чэрвені 2021 года былы кандыдат у прэзідэнты Віктар Бабарыка быў прысуджаны да 14 гадоў пазбаўлення волі ў калоніі строгага рэжыму. Бабарыка прызнаны вінаватым у адмыванні грошай і атрыманні хабараў. Ён таксама быў аштрафаваны на суму, эквівалентную 57 000 долараў ЗША, і яму было загадана выплаціць больш за 18 мільёнаў долараў ЗША ў якасці кампенсацыі за прычыненую шкоду», — гаворыцца ў дакладзе.
«Гэтыя сфабрыкаваныя, палітычна матываваныя абвінавачванні супраць кандыдата ад апазіцыі падкрэсліваюць крайнія мінімумы, да якіх апусціцца беларуская ўлада, каб выкараніць свабоду слова і пагасіць іншадумства. Прастора для ажыццяўлення правоў чалавека ў Беларусі за апошнія гады практычна знікла. Сістэмны пераслед і запалохванне тых, хто адважваецца выказацца супраць Лукашэнкі падкрэслівае змрочную карціну грамадзянскіх правоў у краіне» — сказала Сільвія Мбатару, даследчыца грамадзянскай прасторы Усходняй Еўропы CIVICUS.
«Працяглае падаўленне грамадзянскай супольнасці і знішчэнне свабоды прэсы паказваюць, чаму Беларусь апусцілася на самы нізкі ўзровень у глабальных рэйтынгах CIVICUS Monitor. З улікам сотняў палітвязняў, затрыманых пасля антыўрадавых пратэстаў, а таксама пагроз забойствам і рызыкі траўмаў, з якімі штодня сутыкаюцца актывісты, стан грамадзянскіх правоў у Беларусі жаласны» — адзначыла Мбатару.
У гэтым годзе CIVICUS ацаніла стан свабодаў грамадзянскай супольнасці ў 197 краінах свету. Беларусь — адзіная еўрапейская краіна, якая атрымала рэйтынг «закрытая». Такі ж рэйтынг маюць яшчэ 24 дзяржавы, у тым ліку Кітай, Саудаўская Аравія, Іран і Сірыя.