Беларускія недзяржаўныя медыя аднаўляюцца, нягледзячы на рэпрэсіі
На мінулым тыдні была затрыманая рэдактарка «Новага Часу» Аксана Колб. Шмат беларускіх журналістаў былі вымушаныя з'ехаць з краіны летась пад ціскам маштабных рэпрэсій.
Рэдакцыя «Новага Часу» рассылае апошні нумар газеты чытачам. Жнівень 2021 года.
Многія паехалі ва Украіну, але пасля пачатку вайны людзі зноў былі вымушаныя пакаваць сваё жыццё ў адзін-два чамаданы і зʼязджаць.
– Назіраецца асцярожнае аднаўленне, таму што 2021-ы быў разгромны для незалежных рэдакцый, улады прайшліся катком. Цяпер рэдакцыі паціху вяртаюць свае напрацоўкі, устойлівасць калектываў, устойлівасць мадэляў працы. Можна гаварыць пра беларускія медыя з асцярожным аптымізмам. Тым больш пасля пачатку вайны цікаўнасць да інфармацыі, яе запатрабаванасць павялічылася, – гаворыць намеснік старшыні Беларускай асацыяцыі журналістаў Барыс Гарэцкі.
Беларускія медыйшчыкі загартаваныя ўмовамі працы – праца журналістаў ніколі не была лёгкай у Беларусі.
– Ва Украіне было каля ста беларускіх журналістаў, большасць выехалі, бо немагчыма рабіць якасную журналістыку, калі ты пад пагрозай, працаздольнасць нізкая. Калегі разʼехаліся па такіх краінах, як Польшча, Літва, Нямеччына і іншыя. Мы ўжо мелі пэўны досвед пераездаў. Для нас працаваць у дарозе, на вакзале, у гатэлі, у часовай сітуацыі стала нормай за апошнія гады.
Апошнім часам была інфармацыя пра «місію Макея» – спробы знайсці кантакты з Еўрасаюзам. Але прайшла нарада з сілавікамі і па Беларусі пракацілася новая хваля затрыманняў, пад якую патрапіла і рэдактар «Новага Часу» Аксана Колб. Яна прынцыпова не з'язджала з Беларусі, казала, што «мусяць зʼехаць тыя, хто ладзіць рэпрэсіі, а не я». Уся яе праца была скіраваная на тое, каб у Беларусі было жыццё – у беларускай, свабоднай, дэмакратычнай Беларусі.
Цяпер у няволі 25 супрацоўнікаў медыясферы. Некаторыя журналісты ўжо адбываюць прысуды ў месцах пазбаўлення волі, гэта:
Кацярына Андрэева, журналістка тэлеканала «Б*лсат»
Дарʼя Чульцова, журналістка тэлеканала «Б*лсат»
Ігар Лосік, кансультант «Радыё С***ода»
Сяргей Гардзіевіч, журналіст сайта «Першы Рэгіён»
Аляксандр Івулін, журналіст Tribuna
Алег Груздзіловіч, журналіст «Радыё С***ода»
У Беларусі працягвае запраўляць сілавы блок. Ім нармальна і камфортна, калі «не да законаў».
Паводле ВХ, polskieradio.pl