Cхуднеў, абвастрылася падагра, шмат чытае, допытаў няма. Аляксандар Фядута пад вартай ужо 4 месяцы

Жонка палітвязня расказала пра яго стан здароўя і дазвол на набыццё новых кніг.

Жонка палітычнага вязня Аляксандра Фядуты Марына Шыбко расказала апошнія навіны ад мужа. Вядомы паліттэхнолаг і філоляг ужо 4 месяцы знаходзіцца ў турме, так званай «амерыканцы» ў цэнтры Мінска, па абвінавачанні ў «змове» супраць дзяржаўнага ладу.

Утрыманне Фядуты пад вартай падоўжылі да 12 кастрычніка, але ён з турмы піша, што збіраецца сустрэць там і дзень нараджэньня, і Новы год.

Жонка перадала Фядуту ў камеру тэлевізар.

«Следчыя дзеянні тры месяцы не праводзіліся, напэўна, не прыдумалі далейшы сцэнар «кіна». Памяняліся сукамернікі, пра што журыўся, дзецюкі былі прыстойныя і «рукастыя», што нават штаны яму ўшылі, якія «выходныя», бо схуднеў. Спякоту перанёс ніштавата, вырвалі зуб вельмі ўдала, але аднавілася падагра, кульгае, а кіёчак нельга ўзяць».

Марына Шыбко адзначае, што Аляксандар вельмі рады, што аднавіліся закупкі кніг, ён набыў «Московскую сагу» Аксёнава, «Сандро из Чегема» Іскандэра, тры часткі «Чонкина» і «Путешествие дилетантов» Акуджавы.

Таксама жонка адзначае, што Фядута «падсадзіў» сукамернікаў на прозу Сяргея Даўлатава, абмеркаванне якой перарасло ў сапраўдную чытацкую канферэнцыю.

«Піша, што не ўкладаецца ў галаве закрыццё НДА. Перадае прывітанні ўсім сябрам, якія памятаюць і пішуць, нават калі не даходзяць лісты».

Паводле «Свабоды».