Гродзенцаў, якіх затрымлівалі за «несанкцыянаваную акцыю», сталі выклікаць на здачу біяматэрыялаў

Лік выкліканых здаваць сліну ідзе на дзясяткі.

Жыхароў Гродна, якіх затрымлівалі паводле артыкула за «несанкцыянаваную акцыю» (цяпер арт. 24.23 КаАП РБ, раней – арт. 23.34) сталі выклікаць у міліцыю для здачы біяматэрыялу, расказваеHrodna.life.
За апошні тыдзень выклікі пачасціліся, і, мяркуючы па нумарацыі позваў, лік ідзе на дзясяткі чалавек. У позвах прычыны выкліку не напісаныя, некаторых выклікалі нават без позваў — праз тэлефанаванне. Па тэлефоне тлумачаць, што выклікаюць, калі чалавек праходзіў паводле артыкула за «несанкцыянаваную акцыю».
Цягам некалькі хвілін у людзей бяруць узор сліны, фатаграфуюць у анфас і профіль, а калі ў базе няма адбіткаў пальцаў, здымаюць адбіткі.
Якую практычную карысць (акрамя прыніжэння ці застрашвання) такая працэдура можа мець у палітычных рэпрэсіях, невядома. З узору сліны можна атрымаць «адбітак» ДНК чалавека, каб параўнаць яго з, напрыклад, кропляй крыві, следам вуснаў на цыгарэце або коранем воласа. Але для гэтага трэба мець узор ДНК з месца злачынства, з якім параўноўваць.
Базы ДНК ёсць у шэрагу краін, у тым ліку ў Расіі — там збіраюць звесткі пра ДНК асуджаных за цяжкія і асабліва цяжкія злачынствы. Апараты для хуткага аналізу ДНК каштуюць каля 30 тысяч долараў, іх ужыванне слаба ўрэгуляванае. Этычнасць выкарыстання баз ДНК сілавікамі ў свеце выклікае спрэчкі.