Грузія не будзе ўводзіць візы для беларусаў

Кіроўная партыя ў парламенце «Грузінская мара» не разглядае ўвядзенне віз для расіян і беларусаў.

Старшыня партыі Іраклій Кабахідзэ паведаміў, што «ў Грузіі існуе пэўны рэжым, які няма неабходнасці пераглядаць. Астатняе — здагадкі, якія звязаны з ваеннай рыторыкай. Натуральна, мы не будзем у гэтым далучацца да радыкальнай апазіцыі».

Паводле яго слоў, бескантрольнага ўезду замежнікаў у Грузію няма.

«Рызыкі не пацверджаныя. За гэта адказваюць адпаведныя ведамствы, і яны ўсё кантралююць», — адзначыў Кабахідзэ.

Раней увядзенне віз для беларусаў і расіян ініцыявала грузінская апазіцыя.