«Хто вам патэлефанаваў?» Блогер Андрэй Павук паведаміў у 102 на ўзлом яго кватэры, і вось што пачуў у адказ

Раніцай 26 траўня супрацоўнікі міліцыі прыйшлі з ператрусам у беларускую кватэру блогера Андрэя Павука і ягонай былой жонкі Вольгі ў пасёлку Акцябрскі Гомельскай вобласці. Акрамя таго, ператрусы прайшлі ў кватэры бацькоў блогера і ягонай жонкі. Пра гэта ён распавёў у сваім блогу «Рудабельская паказуха», піша найбуйнейшы беларускі партал (прызнаны «экстрэмісцкім»).

— Да нас у Акцябрскі прыехалі невядомыя людзі на бусе, і сталі рабаваць нашу кватэру. Забралі знаёмага з Акцябрскага, у межах нейкай крымінальнай справы. Як я зразумеў «за зносіны з намі», — апісвае сітуацыю Павук.

Па словах блогера, ператрусы прайшлі таксама ў бацькоў яго былой жонкі і яго бацькоў. Але нікога не затрымалі.

Акрамя таго, Андрэй Павук патэлефанаваў у міліцыю, паведаміўшы, што невядомыя грамяць ягоную кватэру. Калі аператар па тэлефоне 102 даведалася, хто менавіта ёй тэлефануе, і што сам Андрэй знаходзіцца ў Літве, адбыўся наступны дыялог.

— А адкуль у вас інфармацыя, што там адбываецца?

— Ёсць інфармацыя, не магу сказаць ад каго.

— Хто вам паведаміў і адкуль у вас такая інфармацыя, што там адбываецца? Хтосьці жыве ў вас?

— З суседняга дома мне паведамілі. Там ніхто не пражывае.

— Гэта значыць праніклі невядомыя, і што робяць?

— Грамяць ўсё там, ламаюць.

— А што значыць «грамяць, ламаюць», маёмасць?

— Так, б'юць там усё.

— Суседзяў кантактны тэлефон, хто патэлефанаваў?

— Не магу сказаць.

Нагадаем, раніцай 26 траўня ў вёсцы Страдзеч пад Берасцем затрымалі бацькоў вядомай беларускай опернай спявачкі Маргарыты Ляўчук. Праўладныя тэлеграм-каналы паведамляюць, што іх затрымалі «за непадпарадкаванне»: нібыта не хацелі адчыняць дзверы сілавікам (пазней ім прысудзілі штраф у эквіваленце 4000 долараў).

Маргарыта Ляўчук, Андрэй і Вольга Павук знаходзяцца за мяжой. Пасля вымушанага ад'езду з Беларусі Андрэй і Маргарыта стварылі дуэт «Чырвоная Зеляніна», які высмейвае сваімі вострасацыяльнымі песнямі суровыя Беларускія будні. Раней пракуратура Беларусі паведаміла аб распачынанні ў дачыненні да музыкаў крымінальных спраў. На Андрэя завялі крыміналку паводле ч. 3 арт. 203-1 (незаконныя дзеянні ў дачыненні да інфармацыі аб прыватным жыцці і персанальных дадзеных) і арт. 369 (абраза прадстаўніка ўлады). На Маргарыту — за здзек над дзяржсімволікай.

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: