Ігар Банцэр: З'язджаць? Абсалютна гэтага не будзе

Рок-музыка Ігар Банцэр, асуджаны на паўтара года «хіміі», па выхадзе на волю заявіў, што ні пра што не шкадуе і распавёў «Свабодзе» пра сваё здароўе.

17 снежня Ігар Банцэр выйшаў на волю. З 25 лістапада палітвязня 22 дні ўтрымлівалі ў карцары.

Банцэра абвінавацілі за перформанс у выглядзе танца без штаноў перад машынай міліцыі (ч. 1 арт. 339 Крымінальнага кодэксу). 19 сакавіка ў Банцэру прысудзілі 1,5 года «хіміі».

Ён адбываў пакаранне ў Віцебску.

Пасля вызвалення Банцэр сказаў, што не лічыць сябе вінаватым і ні пра што не шкадуе:

«Мне прапаноўвалі пісаць ліст, прасіць памілавання. Я не пагадзіўся. Пра што? Я нічога не парушаў, я лічу сябе невінаватым чалавекам. Я застаюся ў гэтай краіне, і калі я пацярпеў за сваю ідэю, ну што зробіш? Я буду тут трываць далей.

З'язджаць? Я зараз магу сказаць, што ў мяне слабое здароўе, што я паеду лячыцца дзе-небудзь у паўднёвых краінах. Абсалютна гэтага не будзе. Я пайду лячыцца ў беларускую бясплатную медыцыну, на якую я клаў грошы як грамадзянін і падаткаплацельшчык.

А калі прыйдзецца зноў за свае ідэалы пацярпець, ну што ж, будзем сядзець. У Беларусі мне падабаецца настолькі, што тут я гатовы сядзець у турме».

За кратамі Банцэр двойчы трымаў працяглыя галадаванні: 16 дзён без ежы і вады сёлета ў сакавіку, 19 дзён на вадзе ўлетку. Гэта моцна пагоршыла ягонае здароўе. Да таго ж, пасля выхаду з гарадзенскай турмы ў яго выявілі гепатыт С.