Iraqi Airways атрымала дазвол на рэйсы ў Мінск для рэпатрыяцыі грамадзян Ірака з беларуска-польскай мяжы

Ірак вырашыў рэпатрыяваць сваіх грамадзян, якія жадаюць пакінуць польска-беларускую мяжу.

Кампанія Iraqi Airways, якая прыпыніла палёты ў Мінск яшчэ ў жніўні, атрымала дазвол на палёты ў Беларусь для вывазу грамадзян Ірака на радзіму, паведамляе «Голас Амерыкі».

Прадстаўнік МЗС Ірака заявіў, што дыпламатычнае ведамства складае спісы грамадзян Ірака, якія апынуліся ў бязвыхадным становішчы на мяжы паміж Беларуссю і Польшчай і добраахвотна жадаюць з'ехаць на радзіму.

«Мы гатовы арганізаваць не адзін рэйс, каб тэрмінова адрэагаваць на [просьбы] усіх, хто хоча вярнуцца дадому добраахвотна», — сказаў афіцыйны прадстаўнік ірацкага Міністэрства замежных спраў Махамед ас-Сагаф.

Сотні нелегальных мігрантаў і патэнцыйных просьбітаў прытулку, многія з якіх з'яўляюцца курдамі з Ірака, аказаліся заблакаваныя на мяжы Беларусі і Польшчы ў той час, калі слупок тэрмометра ў гэтым раёне набліжаецца да 0 градусаў па Цэльсію. Сусветная арганізацыя аховы здароўя заявіла ў пятніцу, што «вельмі занепакоена» цяжкім становішчам бежанцаў на мяжы паміж Польшчай і Беларуссю.

Польшча адмаўляецца дазволіць ім перасячы мяжу, а Захад абвінавачвае Аляксандра Лукашэнку ў тым, што ён завозіць нелегальных мігрантаў у сваю краіну для адпраўкі іх у ЕС у адплату за ўведзеныя супраць Мінска санкцыі.

«Супрацоўнікі пасольстваў Ірака з Масквы і Варшавы накіраваліся да мяжы, каб «праверыць бяспеку (умоў, у якіх знаходзяцца мігранты) і звязацца з мясцовымі ўладамі», — сказаў Сагаф.

Беларускія дыпламатычныя місіі ў Багдадзе і ў рэгіянальнай сталіцы Курдыстана Эрбіле, якія выдавалі іракцам турыстычныя візы, былі «часова закрытыя» на мінулым тыдні, дадаў ён.

Ірацкая авіякампанія Iraqi Airways прыпыніла «на нявызначаны тэрмін» рэйсы паміж Багдадам і Мінскам яшчэ ў жніўні, паведаміў афіцыйны прадстаўнік авіякампаніі Гусейн Джаліль.

«Але мы атрымалі дазвол на выкананне палётаў у адзін бок паміж Мінскам і Багдадам для заблакіраваных у Беларусі іракцаў», — дадаў ён.

У апошнія тыдні патэнцыйныя мігранты былі вымушаныя дабірацца да Беларусі праз трэція краіны, звычайна — праз Турцыю. Аднак Турцыя ў пятніцу ўвяла забарону для грамадзян Сірыі, Ірака і Емена на пасадку на борт самалётаў, што вылятаюць у Беларусь.

Віцэ-прэзідэнт Еўрапейскай камісіі Маргарыціс Схінас у панядзелак адправіцца ў Багдад для перамоваў наконт гуманітарнага крызісу, які працягваецца.

Паводле «Свабоды». 

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: