Яніна Пушкіна: «Напісаў, што горш, чым у СІЗА…»
Ад мастака Алеся Пушкіна прыйшоў першы і пакуль адзіны ліст з калоніі.
30 сакавіка мастак быў асуджаны на 5 гадоў калоніі строгага рэжыму (падчас закрытага працэсу ён парэзаў сабе жывот у знак пратэсту).
Алеся Пушкіна прызналі вінаватым у «наўмысных дзеяннях у рэабілітацыі нацызму, учыненых групай асоб» і ў «здзеку з дзяржаўных сімвалаў». Падставай для абвінавачанняў сталі карціны з цыкла «Беларускі супраціў» і перформанс, які ён правёў ва Украіне.
Мастак знаходзіцца за кратамі з сакавіка 2021 года. Падаваць апеляцыйную скаргу ён адмовіўся.
У красавіку Алеся Пушкіна адправілі ў папраўчую калонію №22 у Івацэвіцкі раён («Воўчыя норы»).
— За ўвесь час, пакуль муж у «Ваўчыных норах», ад яго прыйшоў усяго адзін ліст, — распавяла «Народнай Волі» Яніна Пушкіна. — Амаль месяц ужо наогул няма ніякіх вестак — ні лістоў, ні званка, таму не выключаю, што Алеся змясцілі ў штрафны ізалятар. Адваката ў яго няма, таму няма каму і даведацца, што там адбываецца.
— Пра што пісаў Алесь у тым лісце, што дайшоў да вас?
— Нагадаў, што яму прывезці: спартыўны касцюм, тэлефонную картку. Здаецца, раз на тыдзень дазволена тэлефанаваць з калоніі дадому, але апошнім часам званкоў няма.
Толькі два разы пазваніў, але гаварылі менш за хвіліну, бо, мабыць, карыстаўся чужой карткай. Паспеў сказаць, што ў калоніі яшчэ горш, чым было ў СІЗА на Валадарскага.
Дадаў: чакайце мой ліст, я паведамлю, калі можна будзе прывезці касцюм, тэлефонную картку і астатняе. Але з таго часу, як ужо казала, няма зусім ніякіх вестак.