«Калі ўвесь час крычаць: "NATO! NATO!", то хто-небудзь можа і пачуць»
Аўтар тэлеграм-каналу «Лісты да дачкі» расказвае пра падрыхтоўку асобнымі беларускімі генераламі да вайны з NATO. Але гэтая падрыхтоўка добрая да таго часу, пакуль NATO пра гэта не ведае.
Фота з mavink.com
Генерал Хрэнін рыхтуецца да вайны з NATO. Ён сам так сказаў. На сеансе групавой псіхатэрапіі, які называецца Маскоўская канферэнцыя па міжнароднай бяспецы. Вось NATO, можа, не ведае, што генерал Хрэнін збіраецца з ім ваяваць, а генерал Хрэнін збіраецца.
Нічога, калі NATO раптам як-небудзь даведаецца, то яму мала не падасца. У сэнсе NATO мала не падасца, а не таму, пра каго ты падумала. Таму што ў генерала Хрэніна багаты вопыт супрацьстаяння інтрыгам англасаксонскага «залатога мільярда». Генерал Хрэнін яму супрацьстаяў, яшчэ калі гэты мільярд атакаваў беларускіх генералаў сцягамі, стужачкамі і наступальнымі чаяваннямі ў дварах. Насілу тады адбіліся.
Але генерал Хрэнін выстаяў. І абараніў стэлу ад дзяўчынак у белым з кветкамі. Не ў кожнага генерала атрымалася б адстаяць стэлу ад дзяўчынак у белым з кветкамі. Генералы NATO дакладна б так не змаглі. А генерал Хрэнін змог. Цяжка было, але не завагаўся. Абараніў, як той казаў, сваю цывілізацыйную самабытнасць.
Так што, патрэніраваўшыся на дзяўчынках з кветкамі, генерал Хрэнін і з NATO зможа, калі што. NATO, праўда, наўрад ці прыйдзе да яго з кветкамі, але сэнс жа не ў гэтым. Сэнс у тым, каб NATO не даведалася, што генерал Хрэнін сабраўся з ім ваяваць. І пакуль NATO не ведае, што генерал Хрэнін сабраўся з ім ваяваць, генерал Хрэнін гатовы даць адпор любому, хто паквапіцца на яго незалежнасць, суверэнітэт і тэрытарыяльную цэласнасць. Асабліва калі гэта будуць дзяўчынкі і з кветкамі. А не NATO, з чым там у яго ёсць.
Увогуле, што ты мне не кажы, але генералы ў нас у краіне ўсё ж такі дзівосныя. Хоць якое ў генералаў начальства, такія ў гэтага начальства і генералы. Вось у дваццатым годзе яны адстойвалі свой канстытуцыйны лад ад пенсіянераў і дзяўчат у белым. А цяпер адстойваюць яго ўжо ад цэлага NATO. Гэта значыць з 2020 года бяспека ўзрасла экспанентна. Нездарма, атрымліваецца, змагаліся. Вялікія, разумееш, майстры геапалітычных стратэгій.
Не хачу табе сказаць нічога дрэннага за беларускіх генералаў, але ёсць у мяне смутнае падазрэнне, што яны і далей аддалі б сабе пенсіянераў і дзяўчат у белым. Ну яго гэта NATO. Супраць пенсіянераў і дзяўчат у белым у генеральскіх унутраных войскаў цяпер ёсць зеніткі, супрацьтанкавыя ўстаноўкі і мінамёты. А што ў іх ёсць супраць NATO? Уяўная атамная бомба? Цыркавы спецназ? Так іх спецназам добра цэглу галавой калоць.
А бо калі ўвесь час крычаць: «NATO! NATO!», то хто-небудзь можа і пачуць. Прычым, не абавязкова адразу NATO. Таму што ніякага NATO на беларускіх генералаў не трэба. Падазраю, што на іх наогул не шмат трэба. Асабліва калі не з кветкамі. І не пенсіянераў.
І асабліва праз тры гады пасля таго, як сокалы скінулі пацука на прыступкі Дома ўрада ў дзень адмовы ў рэгістрацыі Бабарыку і Цапкалу.
Глядзіце таксама
