Кіраўнік B*POL пра гродненскага «тэрарыста»: Дзіўны парык у чалавека, падобна на пастаноўку

«Знялі фільм, пастралялі, разграмілі кватэру». Так кіраўнік B*POL Аляксандр Азараў пракаментаваў «Е*рарадыё» дзіўнае «забойства тэрарыста» ў Гродне, пра якое заявіў КДБ Беларусі.

Экс-сілавік звярнуў увагу, што «тэрарыст», якога паказалі па дзяржаўным тэлебачанні, даволі незвычайны. Напрыклад, у яго на галаве парык, па якім адразу бачна, што гэта парык:

— На першы погляд, дадобна на фэйк. Ніякай інфармацыі пра тое, што на самой справе КДБ праводзіў нейкія мерапрыемствы і страляў там па людзях, у нас няма. Калі такое адбываецца, пра гэта ведае ўся міліцыя і наогул па трывозе падымаюцца людзі. Але нічога такога не было, і ў МУС ніхто не чуў нічога на гэты конт.

— Здымалі фільм?

— Магчыма. Бо міліцыя заўсёды задзейнічаная ў такіх выпадках. Напрыклад, калі ўзяць участковых інспектараў міліцыі, яны, калі нешта здараецца, ходзяць па ўсіх дамах навокал, пад’ездах, кватэрах і апытваюць людзей — што адбылося? Але такой інфармацыі няма, ніхто нічога не распавядае.

— Вось вы глядзелі на гэтага чалавека, якога сілавікі называюць тэрарыстам? Наколькі ён рэальны?

— Дзіўны парык у чалавека. Калі гэта шпіён, ён не будзе так апранацца. Падобна на пастаноўку.

— Інфармацыю падаюць так, што гэты нібы тэрарыст, якога «беглыя» экстрэмісты пераправілі з Польшчы, — гэта абвінавачванне ў бок B*POL?

— Я не ведаю ў Польшчы ні экстрэмістаў, ні тэрарыстаў. Нам кажуць, што гэта замежны грамадзянін з падробленым расійскім пашпартам. Бо калі, напрыклад, сказаць, што гэта беларус і назваць яго дадзеныя, то адразу ўсе знойдуць яго сваякоў і знаёмых. Пачнуцца роспыты, што за чалавек і куды падзеўся. Тады адразу гэты фэйк будзе развеяны. А іншаземец — дык іншаземец. Ніхто не знойдзе. Дадзеных яго нам не даюць — нібы называюць прозвішча, але і яно несапраўднае.

Скажу, што ніякія іншаземцы ў беларускіх арганізацыях, якія займаюцца супрацівам, не працуюць. Толькі беларусы змагаюцца з рэжымам у беларускіх арганізацыях. Дзіўна чуць пра нейкіх іншаземцаў.

— Як лічыце, навошта рэжыму патрэбны такі фільм?

— Я думаю, што гэта адказ на акцыю з самалётам у Мачулішчах, дзе яны [прадстаўнікі рэжыму] пацярпелі паразу. Каб выправіць сітуацыю, беларусам па беларускім тэлебачанні і паказваюць такія сюжэты, маўляў, мы ўсё ж такі не такія слабыя, як вы думаеце, мы можам затрымліваць тэрарыстаў і яшчэ паказваць такія сілавыя затрыманні з ужываннем зброі і гранат. Яны хочуць рэабілітавацца перад беларускім грамадствам.

— Тое, што ў гэты дзень у Гродне стаялі нейкія блокпасты, а ў людзей правяралі дакументы — працяг гэтага шоў?

— Канешне, проста трэба паказаць, што нібы нешта адбываецца. Шоў яны любяць і ўмеюць добра рабіць.