Купалле пад пальмамі. Фотарэпартаж

У грузінскім Батумі ўвечары 6 ліпеня беларусы адзначылі Купалле. Мерапрыемства праходзіла ў межах Сусветнага тыдня беларускай культуры. 
Нягледзячы на задушлівую спёку, імпрэза сабрала больш за сотню беларусаў. Пад гукі тэматычнай беларускай музыкі (ад «Znich» і Памідорава да Вайцюшкевіча) на пляцоўцы з'яўлялася ўсё больш барадатых хіпстэраў у вышыванках, дзяўчат і жанчын у нацыянальных строях і дзетак розных узростаў.



Мерапрыемства пачалося з майстар-класа па пляценні вянкоў для дзетак і бацькоў. 



Упрыгожаныя вянкамі ўдзельнікі імпрэзы склалі велізарны шматузроўневы карагод.




Далей прыйшла чарга калейдаскапічнага спалучэння беларускіх нацыянальных танцаў, гульняў для дзяцей і дарослых, выступаў Спеўнага Сходу.




Сярод хмарачосаў і пальмаў разносіліся мелодыі беларускіх песняў: «Ой рана на Івана», «У нас сёння Купала», «Шла Купалка», «Туман Ярам», «Чырвоная Ружа».

Дарослыя з захапленнем танчылі «Маразулю», «Ойру», «Карапет» і «Явар»




Імпрэза скончылася надвячоркам. У промнях зыходзячага сонца, пад пальмамі чыста і ўзнёсла гучала нашая «Купалінка». Мясцовыя жыхары і спаленыя сонцам адпускнікі, што вярталіся з пляжаў у здымныя кватэры, спыняліся, рабілі сэлфі. Магчыма ім нават няўцям было, што гэта не чарговая атракцыя дзеля забаўлення турыстаў.

Людзям, выкінутым з Радзімы, вельмі важна трымацца адно аднаго і сваіх традыцый. Калісьці ўсё гэта скончыцца, і яны абавязкова вернуцца. Галоўнае, каб не разарвалася тое, што нітуе з Беларуссю. Таму і ладзяцца пад пальмамі — узімку Калядкі, а зараз — Купалле.


Імпрэзы ў межах Тыдня беларускай культуры ў Батумі працягнуцца да 9 ліпеня.

Праграма Тыдня беларускай культуры ў Батумі даступная тут.
Праграму сусветных Дзён беларускай культуры цалкам можна паглядзець на сайце https://belarusis.art/


Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: