Лісты палітвязня Мікалая Дзядка працягваюць знішчаць
Лісты, дасланыя палітвязню-анархісту, журналісту «Новага Часу» Мікалаю Дзядку, у ПК № 9 у Горках, дэманстратыўна знічшаюць.
Пра гэта распавёў
палітвязень у адныі з лістоў, што дайшлі з-за кратаў на волю:
“З лістамі сітуацыя ўсё тая ж. Працягваюць дэманстратыўна адбіраць на знішчэнне перада мной, усё пад відэарэгістратар. Думаю, спадзяюцца вывесці мяне з сябе і справакаваць на сварку.
У нядзелю, 24 красавіка, выйшаў з ШІЗА. У прагулачным дворыку спытаў у суседняй камеры, калі ў нас бібліятэка, – 6 сутак, потым дадалі яшчэ 3 за аналагічнае парушэнне.
Дарэчы, наконт кніг, прачытаў нядаўна "Уваскрэсенне" Л. Талстога. Наймагутная кніга, проста шэдэўр. Там і пра судова-адміністрацыйнае самавольства, прытым тыпажы дробных сатрапаў і чыноўнікаў як быццам спісалі з сённяшніх. І пра духоўны рост чалавека, і пра хрысціянскія каштоўнасці, якімі яны павінны быць. Напэўна, менавіта за гэтую кнігу Льва Талстога адлучылі ад праваслаўнай царквы. Шкадую, што не прачытаў яе гадоў у 14. Тады б мае погляды склаліся значна раней".
Нагадаем, актывіст анархічнага руху, журналіст і блогер Мікалай Дзядок у лістападзе 2021 года быў асуджаны на 5 гадоў калоніі. Яго прызналі вінаватым па трох артыкулах:
арт. 342 Крымінальнага кодэкса — Арганізацыя і падрыхтоўка дзеянняў, што груба парушаюць грамадскі парадак, альбо актыўны ўдзел у іх; арт. 361 Крымінальнага кодэкса — Заклікі да дзеянняў, скіраваных на прычыненне шкоды нацыянальнай бяспецы Рэспублікі Беларусь; арт. 295-3 Крымінальнага кодэкса — Незаконныя дзеянні ў дачыненні да прадметаў, дзеянне якіх заснавана на выкарыстанні гаручых рэчываў.
Палітвязень віну не прызнаў.
Адрас для лістоў: ПК №9, 213410, г. Горкі, вул. Дабралюбава, 16, Дзядку Мікалаю Аляксандравічу.