Магутная таполя ўсё ж стала ахвярай каналізацыі
Дрэва, якое ўжо даўно служыць неад'емнай часткай архітэктурнага
ансамбля на праспекце Незалежнасці, спілавалі з-за рамонту каналізацыі.
Гараджане і архітэктары ў шоку, але ва УП «Зелянбуд» кажуць, што іншага
выйсця не было.
Таполя расла ў двары паміж дамамі № 34 і 36 на праспекце Незалежнасці,
упрыгожваючы сабой арку дома ў стылі сталінскага ампіру. Такое ж дрэва красуецца па суседству.
Рамонтныя работы праводзяцца на праспекце ў сувязі з аварыйным
станам вонкавых сетак каналізацыі. Будаўнікі тут будуць яшчэ да 30 верасня.
Але таполю спілавалі ўжо сёння.
Па словах галоўнага інжынера УП «Зелянбуд Партызанскага раёна» Віталя Весялова,усе дрэвы, якія было магчыма захаваць
для рэалізацыі праекта, захавалі, але гэтую таполю давялося спілаваць. Справа ў тым, што будуць рабіць раскопкі, каб памяняць усе
студні. А таполя расла прама на калодзежы і пры дэмантажы магла абрынуцца на
будынак.
Перажывала за лёс таполі і галоўны архітэктар праектаў майстэрні ландшафтнай архітэктуры
УП «Мінскпраект» Ганна Аксёнава, якая не так даўно выратавала два клёны ў Аляксандраўскім
скверы, забараніўшы спілоўваць дрэвы на правах навуковага
кіраўніка гісторыка-культурнай каштоўнасці.
Але таполя ўсё ж стала ахвярай каналізацыі, бо такой каштоўнасцю, кажуць, не з'яўляецца.
"Аляксандраўскі сквер — гісторыка-культурная каштоўнасць, і кожнае
дрэва там выдаляецца толькі з дазволу Мінкульта. Таполі на праспекце
Незалежнасці, нягледзячы на статус праспекта (гісторыка-культурная
каштоўнасць), не з'яўляюцца ахоўным аб'ектам для
міністэрства, — патлумачыў начальнік упраўлення па ахове гісторыка-культурнай спадчыны Мінкульта Ігар Чарняўскі.
Фота Аляксея Сіпачова
А на гэтым фота таполя яшчэ жывая:
