На якім месцы Беларусь па праведзеных тэстах на каронавірус?

На сайце Белтэлерадыёкампаніі з’явілася інфармацыя, што Беларусь займае другое месца па колькасці праведзеных тэстаў на 1 мільён насельніцтва.

У паведамленні сказана, што ў Беларусі на 1 мільён насельніцтва праведзена 22,5 тысячы тэстаў, «на першым месцы Расія з 29,5 тыс. тэстаў на 1 млн жыхароў, на трэцім — ЗША з 22 тыс. на 1 млн».
Тэлеграф вырашыў правесці аналіз і праверыць, ці так гэта на самай справе.
Другое месца ў свеце, калі верыць сайту Worldometers.info, наша краіна не займае. Але калі паглядзець на суседнія краіны, а таксама краіны, якія ўваходзяць у склад ЕАЭС, то тут мы ўжо набліжаемся да ісціны.
Беларусь сапраўды займае другое месца па колькасці праведзеных тэстаў на 1 млн насельніцтва, але не ў свеце, а сярод краін ЕАЭС:

1. Расія — 30 564 тэсту на 1 млн насельніцтва
2. Беларусь — 22 369 тэстаў на 1 млн насельніцтва
3. Казахстан — 17 064 тэсту на 1 млн насельніцтва
4. Арменія — 8 722 тэсту на 1 млн насельніцтва
5. Кыргызская рэспубліка — 8 658 тэстаў на 1 млн насельніцтва

Калі ўзяць краіны, якія мяжуюць з Беларуссю, то наша краіна па колькасці тэстаў на мільён насельніцтва займае чацвёртае месца:

1. Літва — 54 772 тэсту на 1 млн насельніцтва
2. Латвія — 35 071 тэст на 1 млн насельніцтва
3. Расія — 30 564 тэсту на 1 млн насельніцтва
4. Беларусь — 22 369 тэстаў на 1 млн насельніцтва
5. Польшча — 10 418 тэстаў на 1 млн насельніцтва
6. Украіна — 3 196 тэстаў на 1 млн насельніцтва

Сярод былых і дзеючых краін СНД Беларусь зноў размясцілася на ганаровым другім месцы:

1. Расія — 30 564 тэсту на 1 млн насельніцтва
2. Беларусь — 22 369 тэстаў на 1 млн насельніцтва
3. Казахстан — 17 064 тэсту на 1 млн насельніцтва
4. Узбекістан — 9 710 тэстаў на 1 млн насельніцтва
5. Арменія — 8 722 тэсту на 1 млн насельніцтва
6. Кыргызская рэспубліка — 8 658 тэстаў на 1 млн насельніцтва
7. Малдова — 5 069 тэстаў на 1 млн насельніцтва
8. Украіна — 3 196 тэстаў на 1 млн насельніцтва
9. Таджыкістан — дадзеных няма

Сусветным лідэрам па колькасці тэстаў на мільён насельніцтва сярод краін з насельніцтвам вышэй за 1 мільён з’яўляюцца Аб’яднаныя Арабскія Эміраты. Пры насельніцтве больш чым 9,6 млн чалавек праведзена 1 200 000 тэстаў. На 1 мільён у ААЭ прыходзіцца 121 330 тэстаў.
Беларусь у сусветным рэйтынгу па колькасці праведзеных тэстаў на 1 млн насельніцтва знаходзіцца на 42 месцы. Аднак, калі не лічыць краіны, насельніцтва якіх менш за 1 мільён чалавек (напрыклад: Сан-Марына, Мальта, Кіпр, Люксембург і г.д.), то Беларусь перамяшчаецца на 28 месца.
Паводле thinktanks.by