На палітвязня Яўгена Харашкевіча цісне адміністрацыя шклоўскай калоніі

Па інфармацыі праваабаронцаў, адміністрацыя калоніі №17 ужо двойчы за месяц змяшчала палітвязня Яўгена Харашкевіча ў штрафны ізалятар. У мінулы раз яго закінулі ў ШІЗА 21 сакавіка на 10 сутак. Адваката тады да Яўгена не пусцілі.

Цяпер ён зноў знаходзіцца ў ізалятары, але за якое «парушэнне» — невядома. Акрамя гэтага, палітвязня пазбавілі кароткатэрміновага спаткання.

Яўгена Харашкевіча затрымалі 19 студзеня 2021 г. у Наваполацку. Яго абвінавацілі адразу па трох артыкулах Крымінальнага кодэксу: ч. 1 арт. 130, арт. 369, ч. 1 арт. 342.

Суд над Харашкевічам праходзіў у закрытым рэжыме. Віцебскі абласны суд 16 верасня асудзіў Харашкевіча да 4 гадоў калоніі.

Пакуль Яўген сядзеў у СІЗА, у яго нарадзілася дачка Мілана. На абвяшчэнне прысуду бацькі Яўгена прынеслі ў залу раздрукаваныя каляровыя фотаздымкі Міланы.