На працэс супраць блогераў Пятрухіна і Кабанава не пусцілі іх паплечнікаў і журналістаў

На працэс не пусцілі журналістаў і паплечнікаў падсудных. Міліцыянты сказалі, што зала занятая і вольных месцаў няма, паведамляе «Свабода».

Падтрымаць зняволеных блогераў сабралася больш за 20 чалавек. Сярод іх кіраўнік Абʼяднанай грамадзянскай партыі Мікалай Казлоў і палітык Анатоль Лябедзька.

Брэсцкіх блогераў Сяргея Пятрухіна і Аляксандра Кабанава вінавацяць у арганізацыі групавых дзеянняў, якія груба парушаюць грамадскі парадак, а таксама ў знявазе прадстаўніка ўлады ў сувязі з выкананнем службовых абавязкаў. Акрамя таго, Пятрухіна судзяць за абразу суддзі. Ім пагражае да 3 гадоў зняволення.

Абодвух беларускія праваабаронцы прызналі палітвязнямі. Іх крымінальны пераслед звязваюць са «справай Ціханоўскага».

Вярхоўны суд задаволіў зварот старшыні Брэсцкага суда, каб крымінальную справу супраць блогераў разглядалі па-за межамі Брэсцкай вобласці. Справу накіравалі ў Кастрычніцкі суд Магілёва.

Хто такія Кабанаў і Пятрухін

Кабанаў і Пятрухін — аўтары YouTube-каналу «Народный репортёр». Да затрымання ў сярэдзіне чэрвеня 2020 году асвятлялі барацьбу жыхароў супраць будаўніцтва акумулятарнага заводу ў Брэсце і іншыя актуальныя сацыяльныя тэмы.

49-гадовага Сяргея Пятрухіна затрымалі ў вёсцы пад Пухавічамі 16 чэрвеня і даставілі ў кобрынскі ізалятар, а 25-га перавезлі на ІЧУ Мінску, адтуль у СІЗА-1 на вуліцы Валадарскага.

Пятрухіна ў красавіку 2019 года Ленінскі раённы суд Брэста прызнаў вінаватым у публічнай знявазе міліцыянтаў і прызначыў яму штраф у 360 базавых велічыняў. На той час гэта было 9180 рублёў. Блогер меўся сплаціць пацярпелым супрацоўнікам міліцыі кампенсацыю маральнай шкоды ў 7500 рублёў. Паводле праваабаронцаў, справа супраць блогера была палітычна матываванай.

49-гадовы Аляксандр Кабанаў — сябра АГП, падчас леташніх выбараў быў прэсавым сакратаром ініцыятыўнай групы Святланы Ціханоўскай. Затрымалі яго 15 чэрвеня 2020 года і прысудзілі 15 дзён арышту за «кармленне галубоў» 7 траўня. 25-га стала вядома, што яго этапавалі ў следчы ізалятар Мінску. У доме бацькоў быў праведзены ператрус.