Няўзораў пра «ПВК Родан»: Рэжым сам стварыў сабе гэта гора, уступіўшы ў канфлікт з цэлым пакаленнем

Расійскі публіцыст — пра тое, як пуцінскі рэжым уступіў у канфлікт з цэлым пакаленнем.

Калаж Baza

— Для Крамля раптам галаўным болем стала «ПВК Родан», — цытуе Аляксандра Няўзорава «Салідарнасць» са спасылкай на яго ютуб-канал. — І вось гэты «Родан» стаў невядомым новым бедствам.

Але рэжым сам стварыў сабе гэта гора, уступіўшы ў канфлікт з цэлым пакаленнем. І нягледзячы на тое, што цяпер гэта ёсць быццам бы яшчэ ў некалькіх краінах, але развіццё гэтая гісторыя, магчыма, атрымае толькі ў РФ, таму што цяпер у Расіі ўсё ў дастатковай ступені прасякнута злосцю і апакаліптыкай.

Ведаеце, бываюць насычаныя растворы і ненасычаныя, і ў гэтым слабенькім растворы вы ніколі не выгадуеце ніякага крышталя.

Толькі руская рэальнасць сёння можа стаць пажыўным асяроддзем для маргіналізацыі падлеткавага асяроддзя. Не забываем, што гэты асяродак пачалі навучаць працы з аўтаматам, што, вельмі верагодна, спатрэбіцца ў баях будучай грамадзянскай вайны.

Рэакцыя ўлады на «ПВК Родан», на думку публіцыста, будзе выключна сілавой і агрэсіўнай, што, у сваю чаргу, можа прывесці да яшчэ больш жудасных наступстваў.

— Рэакцыя ўлады на «Родан», як ужо стала зразумела, будзе тупой і выключна дубіначнай. А адказам на дубіначнасць будзе разлютаванне юных сэрцаў. Хай у пуцінізму будзе яшчэ на адну праблему больш.

Дыктат, халуйскі патрыятызм, злосць, пачварнасць законаў, курс на светазнішчэнне спарадзілі нечаканы рэзананс у галовах расейскіх падлеткаў.

«Родан» — гэта, верагодна, такі першы адказ пакалення на шызафрэнію бацькоў і дзядоў. Іх задушаць, загнабяць, Але паўстане яшчэ больш жорсткі і непрымірымы рух.

Сёння сапраўды ў Расіі дзеці без усялякай будучыні, асуджаныя стаць толькі фаршам, пазбаўленыя надзей на нармальную адукацыю, развіццё, на падарожжа, на тое, каб знаёміцца са светам і з яго дзівосным напаўненнем, — робіць выснову Няўзораў.

У Беларусі папярэджваюць бацькоў пра «масавыя беспарадкі з удзелам узброеных людзей»

Нагадаем, цягам лютага ў Расіі і Украіне атрымала пашырэнне незвычайная субкультура, якая называе сябе «ПВК Родан».

 «ПВК Родан» ніяк не звязана з вайсковымі кампаніямі, абрэвіятура мае хутчэй жартоўны характар. Гэта супольнасць нефармалаў і аматараў анімэ, у прыватнасці, анімэ «Hunter x Hunter». Прыхільнікі «Родана» носяць штаны ў клетку, доўгія валасы, а таксама цішоткі з выявамі павукоў і лічбай 4, што і адсылае да анімэ. У Расіі яны выступаюць супраць футбольных фанатаў-ультрас, мігрантаў і выхадцаў з Каўказа.

У Расіі «ПВК Родан» ужо набыла вядомасць праз сутыкненні з футбольнымі фанатамі, хваляванні з удзелам субкультуры прайшлі і ва Украіне. У абедзвюх краінах праваахоўнікі зацікавіліся супольнасцю, і ўкраінскія сілавікі спрабуюць зразумець, ці ёсць у распаўсюджанні субкультуры расійскі след.

Таксама з’явіліся прысвечаныя субкультуры паблікі. Спачатку стала вядома пра старонкі ў тэлеграме, якія каардынуюць прыхільнікаў у Гомелі і Магілёве, таксама «Родан» мае і сваю старонку для Мінска.

Мінскае «падраздзяленне» назвалі «МОЗД «Андеграунд» — расшыфроўваецца, як тлумачаць самі аўтары старонкі, як «Минское объединение здравого движения». Самае папулярнае відэа ў акаўнце мае больш за 35 тысяч праглядаў. У ім прадстаўнікі субкультуры прапануюць зладзіць сустрэчу ў раёне Каменнай Горкі і дэманструюць фота гіпермаркета «Green» — магчыма, гэта месца будучай сустрэчы.

Яшчэ ў акаўнце ёсць чатыры відэа, якія маюць недзе па 2-3 тысячы праглядаў, першы з ролікаў з’явіўся чатыры дні таму. У адным з іх, напрыклад, сцвярджаецца, што падраздзяленне, якому належыць акаўнт, не бярэ ў палон, і дэманструюцца кадры з барцамі ў залі.

На спробы сабрацца ўдзельнікаў «ПВК Родан» лукашэнкаўскі рэжым адказаў масавым хапуном у розных гарадах. У Мінску, Гомелі, Оршы і іншых населеных пунктах былі затрыманыя сотні падлеткаў.