Па Віцебшчыне і частцы Магілёўшчыны абвясцілі самы высокі — чырвоны — узровень небяспекі

Белгідрамет папярэджвае, што сёння, 29 снежня, з 14 да 20 гадзін па ўсходзе Віцебскай і паўночным усходзе Магілёўскай абласцей — моцны галалёд.

Народныя навіны Віцебска паведамляюць, што ў Віцебску сёння — нерэальны галалёд.

З раніцы ішоў дождж і падмарозіла — у выніку дарогі, тратуары, дрэвы і машыны пакрыліся скарынкай лёду. Абледзянелі і кантактныя сеткі, таму ў горадзе з перабоямі ходзіць электратранспарт.

Трамваі да абеду аднавілі рух, а многія тралейбусы яшчэ стаяць.

Без перабояў ходзяць толькі аўтобусы і маршруткі.

Замярзаючы дождж у Віцебску ішоў усю ноч пры мінусавой тэмпературы, а да шасці гадзін раніцы дыяметр галалёду павялічыўся да 8 міліметраў. Да 9:00, паводле звестак метэастанцыі Віцебска, за дванаццаць гадзін у горадзе выпала 8 міліметраў ападкаў.