Палітзняволеную Марыю Калеснікаву адмовіліся вызваліць пад заклад і падоўжылі арышт

Марыі Калеснікавай падоўжылі арышт да 8 студзеня. Раней ​следства адмовілася вызваліць яе пад заклад, паведаміла «Свабода».

6 лістапада следчыя падоўжылі тэрмін арышту сябра прэзідыуму Каардынацыйнай рады беларускай апазіцыі Марыі Калеснікавай. Пра гэта паведамілі ў прэсавай службе штабу Віктара Бабарыкі.

Раней ​следства адмовілася вызваліць пад заклад сябра прэзідыуму Каардынацыйнай рады беларускай апазіцыі Марыю Калеснікаву, паведаміла ТАСС яе адвакатка Людміла Казак.

Адвакатка ўжо прасіла перавесці Калеснікаву пад хатні арышт — адмовілі, пад асабістае паручальніцтва — адмовілі. Адвакатка яшчэ збіраецца прасіць вызваліць пад падпіску аб нявыездзе.

Гэтыя хадайніцтвы аргументаваныя ў тым ліку тым, што шэраг іншых палітвязняў раней вызвалілі з ізалятараў пасля сустрэчы Лукашэнкі з імі ў СІЗА КДБ. Калеснікава на гэтую сустрэчу ехаць адмовілася.

Цяпер Калеснікава, а таксама адвакат Максім Знак утрымліваюцца пад вартай у якасці абвінавачаных па ч. 3 арт. 361 КК Беларусі (заклікі да дзеянняў, накіраваных на шкоду знешняй бяспекі Рэспублікі Беларусь, яе суверэнітэту, тэрытарыяльнай недатыкальнасці, нацыянальнай бяспецы і абараназдольнасці).

Беларускія праваабарончыя арганізацыі прызналі іх палітвязнямі.

7 верасня Марыю Калеснікаву захапілі невядомыя ў цывільным, а потым спрабавалі гвалтам вывезці ва Украіну, але сябра Каардынацыйнай рады парвала пашпарт на мяжы і пакінула аўтамабіль падчас спробы прымусовай дэпартацыі з Беларусі. З санкцыі пракурора яна была ўзятая пад варту ў ноч на 8 верасня.

16 верасня ёй было прад’яўлена абвінавачанне ў публічных закліках да захопу дзяржаўнай улады або гвалтоўнага змянення канстытуцыйнага ладу.