Палітзняволеную Вольгу Маёраву змясцілі ў карцар

Палітзняволеную Вольгу Маёраву перавялі ў карцар. Пра гэта стала вядома ў аўторак, 15 чэрвеня, калі адміністрацыя гродзенскай турмы адмовілася прымаць для яе перадачу.

Грамадскую актывістку затрымалі ў пачатку студзеня па так званай «справе Мікалая Аўтуховіча», нагадвае Еўрарадыё. Міліцыя прыехала да яе дадому ў вёску Нача Крупскага раёна, правяла ператрус, забрала тэхніку.

Праваабаронцам дагэтуль невядома, у чым канкрэтна падазраюць ці абвінавачваюць Маёраву. У сярэдзіне лютага КДБ уключыў яе, а таксама яшчэ 16 чалавек у спіс арганізацый і фізічных асоб, якія маюць дачыненне да тэрарыстычнай дзейнасці.

У мінулым снежні на БТ выйшаў рэпартаж пра «групу Аўтуховіча». У ім гаварылася ,што «група» можа быць датычная да падпалу дома міліцыянта ў Ваўкавыску і выбуху аўтамабіля супрацоўніка міліцыі ў Гродне.